Ukulongana kwa Muputule Ukupya

Muli shino “nshita shaibela ishayafya,” tulakabila amano yafuma kuli Lesa pa kusenaminwa na Yehova. (2 Tim. 3:1) Ukulongana kwa muputule ukwa mwaka wa mulimo uwa 2005 kukatupeela ukufunda kusuma no kukoselesha ilyo amalyashi yakalalundulula umutwe wa kuti “Muletungululwa na ‘Mano Yafuma mu Muulu.’”—Yako. 3:17.

Amalyashi ya kukonkana aya kubalilapo ayakaba no mutwe ukalamba uukalati, “Ukuba na ‘Mano Yafumu mu Muulu’ mu Mikalile Yesu,” yakatwafwa ukuumfwikisha umwalola ukusanguluka, ukuba no mutende, ukunakilila, no kuba ne cumfwila. Lyene kangalila wa muputule akalanda pa mbali shimbi shitatu isha mano ya ku muulu. Kangalila wa citungu akasondwelela ubushiku bwa kubalilapo pa kulanga ifyo ababomfi ba Bwina Kristu, nangu ca kutila bamo babamona nga “bashasambilila kabili abantu yaweyawe,” balipangashiwa ukulanda pa mano yafuma kuli Lesa.—Imil. 4:13.

Pa bushiku bwalenga shibili, amalyashi ya kukonkana ayakaba no mutwe uukalati “Konkeleleni Ifintu Ifikuulilila” yakatwafwa ukwishiba no kusengauka ifingabongolola bumupashi bwesu. Yakatulanga ne fyo twingakuulilila bambi ilyo tuli mu kulongana kwa pa cilonganino, mu mulimo wa kushimikila, na mu lupwa. Ilyashi lya ku cintubwingi ilikalati, “Ifyo Amano Yafuma Kuli Lesa Yatunonsha,” likalenga ifwe ukucindamikilako ubunonshi tupokelela ilyo tulebomfya ifishinte fya bulesa mu mikalile yesu. Ilyashi lya kusondwelela ilya mutwe wa kuti, “Ukuumfwila Amano Yafuma Kuli Lesa Kulatucingilila,” likakosha umupampamina wesu uwa kwalukila kuli Yehova pa kuti tube na mano muli shino nshiku sha kulekelesha.

Cimo icipulamo mu kulongana konse ukwa muputule kubatishiwa kwa basambi bapya. Isukulu lya Butumikishi Ilya Bulesa ne Sambililo lya Ulupungu lwa kwa Kalinda na fyo fikabako pa kulongana kwa muputule. Yehova afwaya ifwe bonse ukunonkelamo mu mano apeela. Tukanonkelamo lwa ku mupashi mu kufunda no kukoselesha ifiletupembelela pa kulongana kwesu ukwa muputule.—Amapi. 3:13-18.