Beni Abaikatana
1 Miku inga mwapapa pa fyo umubili wa buntunse wapangwa bwino nga nshi? (Amalu. 139:14) Icilundwa cimo na cimo ica mubili cibomba mu kumfwana ne filundwa fimbi. Icebo ca kwa Lesa cipashanya icilonganino ca Bwina Kristu ku filundwa fya mubili ifibombela pamo. Ukutungululwa no Mutwe, Kristu, bonse ababa mu cilonganino baba ‘abasuminkaniwa no kupikaniwa ku mfyufyu shonse, umwabelo kubomba kwa mulingo.’ (Efes. 4:16a) E co Yehova alabomfya abantu bakwe abaikatana ukubomba ifintu ifisuma.
2 Abali mu cilonganino ca mu mwanda wa myaka uwa kubalilapo babombele no “mutima umo” ukusakamanana lwa ku mupashi na lwa ku mubili. (Imil. 2:44-47) Ku bwafwilisho bwa kwa Yehova, mu kwikatana balolenkene no kucimfya ukukaanya kwakaluka. (Imil. 4:24-31) Babilishe ubukombe bwa Bufumu konse uko baleya, ukushimikila imbila nsuma mu fyalo fyonse ifyaishibikwe pali ilya nshita. (Kol. 1:23) Mu nshiku shesu, icilonganino ca Bwina Kristu mu kwikatana calipwishishisha ifi fine fintu pa cipimo cikalamba. Finshi fyaafwa ukuti kube ubu buumo?
3 Ukwikatanishiwa kwi Sambilisho lya kwa Lesa: Mwi sonde lyonse, twalikatanishiwa no kupepa kwesu. Caba shani ifyo? Twalishiba inshila imoneka iya kwa Yehova iyo abomfya ukuteyanishishamo “ifya kulya pa nshita iyene.” (Mat. 24:45) Na kabili twalikatamika “ifya bupe ku bantu” ifyo atupeela nga bakasambilisha mu cilonganino. Ilyo tulepokelela mu kuicefya ifyo Yehova apayanya ku kutuliisha lwa ku mupashi, tulacilapo ukumfwikisha Icebo ca kwa Lesa kabili ici citucincisha ukufwaya ukupashanya Yesu nga basambi bakwe. Tufwile ukutwalilila ukusambilila Icebo ca kwa Lesa, ukuibikilishako ‘ukufika kuli buumo bwa kutetekela.’ (Efes. 4:8, 11-13) Bushe mulesangwilako ku kwikatana kwesu ukwa ku mupashi pa kubelenga Baibolo cila bushiku?
4 Ukwikatanishiwa ku Kubishanya kwa Bwina Kristu: Ukutemwa kulatwikatanya mu kubishanya pa kulongana kwa Bwina Kristu. Pali uku kulongana, ‘tuletetula pali umo no munankwe.’ (Heb. 10:24, 25) Ici cisanshamo ukukanamona fye ifya ku nse lelo no kwishiba bwino bwino bamunyinefwe, ukubamona ifyo Yehova abamona, nga basuma. (Hag. 2:7) Ilyo tuleumfwa ku fyo baleilumbwila icitetekelo, ukutemwa twabatemwa kulakulilako no kwikatana kwesu kulakoselako. Bushe mwaishibikwa ngo usangwa lyonse ku kulongana kwa pa cilonganino?
5 Bakabomba Banensu mwi Bala: Ukushimikila imbila nsuma na basumina banensu kulatwikatanya mu kucita ukufwaya kwa kwa Lesa. Umutumwa Paulo alikatamike ‘ababomfi banankwe ku bufumu bwa kwa Lesa.’ (Kol. 4:11) Ukwebako bambi ifya kukumanya no kwafwana ilyo tuli mu butumikishi kutwafwa ukubomba umulimo wesu uwa Bwina Kristu kabili kulakosha ukwikatana kwesu.—Kol. 3:14.
6 Amaka ya Mupashi wa Mushilo aya Kwikatanya: Ilyo tuleibikilishako ukucita ukufwaya kwakwe, Yehova atupeela umupashi wakwe. Ici citwafwa ukupwisha ukupusana no kwikalilila abaikatana. (Amalu. 133:1) Citucincisha “ukubaka buumo bwa Mupashi mu cikakilo ca mutende.” (Efes. 4:3) Umo umo uwa ifwe kuti asangwilako ku kwikatana kwaba pa bantu ba kwa Lesa pa kuba ne fisabo fya mupashi ilyo tulebomba na bambi.—Gal. 5:22, 23.
7 Ukubombela capamo mu kwikatana mu kutungululwa na Kristu “kulengo Mubili ukule no kuikuula mu kutemwa.” (Efes. 4:16b) Na kabili, kuleta ubukata kuli Yehova, “Lesa wa mutende.”—Rom. 16:20.