Mwilakonkelela Ifintu “Ifya Fye”
1 Inshila imo iyaseeka sana iyo abantu bomfwaninamo, kulembeshanya pa kompyuta. Kwena tacabipa ukwebako balupwa ne fibusa ifiletucitikila ne fyo tulefwaya ukuti beshibe. Lelo fintu nshi “ifya fye” ifingafumamo mu kulembeshanya ukwabula umwakupelela?—Amapi. 12:11.
2 Ifyo Mufwile Ukucenjelako Ilyo Mulelembeshanya: Bamo bamona kwati nga bapokelela ifyebo pa kompyuta ifyo abengi bashishibe, ninshi baishiba bwino sana ifilecitika mu kuteyanya kwa kwa Yehova. Ne fi kuti fyaba fintu ifyacitike mwi bala, amalyashi pa fyacitike pa Bethel, amalipoti pali bamunyinefwe abaponenwe no tuyofi nelyo abalepakaswa, e lyo ne fya nkama ifyo babilisha pa Masukulu ya Butumikishi bwa Bufumu. Bambi nabo balacilamo ukufwaisha ukuba aba ntanshi ukutuma ifi fyebo ku fibusa fyabo.
3 Inshita shimo amalyashi ne fyacitike mwi bala tabafishimika filya fine fyali. Bamo balabikamo no bufi pa kuti fye ilyashi lyumfwike bwino sana. Ilingi line ababutukila ukusokolola ifyebo fya musango yo tabakwata ne fishinka. (Amapi. 29:20) Inshita shimo nangu ca kuti ilyashi talili lya cine abantu balebako abanabo pa kuti fye babebeko ifyo bengatemwa ukumfwa. Amalyashi ya musango yo ayashikwete ifishinka kabili ayalufya abantu cimo cine na “malyashi ya bufi” ayengalenga ifwe ukukanapepa Lesa bwino.—1 Tim. 4:6, 7.
4 Nga mwatuma ifyebo e lyo pa numa casangwa ukuti fya bufi, ni mwe mukaba no mulandu wa kulenga balya bantu ukuba aba bulanda nelyo ukufulunganishiwa. Ilyo Davidi bamwebele ilyashi lya bufi ukuti abana bakwe bonse balibepeye, umutima walikalipe ica kuti ‘alepwile ne fya kufwala fyakwe.’ Lelo te bana bakwe bonse abafwile, ni umo fye. Apo ukumfwa fye ukuti umwana wakwe umo alifwile kwali no ukumuletela ubulanda, kanshi amashiwi ya bufi aya kuti abana bonse balifwile yamulengele uwa bulanda nga nshi. (2 Sam. 13:30-33) Kwena te kuti tutemwe ukucite cintu ca musango yo icingalufya bamunyinefwe nelyo ukubaletela ubulanda.
5 Umo Lesa Atupeelela Ifyebo: Ico tufwile ukwishiba ca kuti Shifwe wa mu muulu alikwata “umusha wa cishinka kabili uwashilimuka,” uo abomfya ukutupeelelamo ifyebo. Uyu “musha” alikwata incito ya kumona ifyebo nga nafilinga ukupeela bakapepa ba kwa Lesa aba cishinka, kabili no kubapeela “pa nshita yalinga.” Pa kutupeela ifya kulya fya ku mupashi abomfya ukuteyanya kwakwe. Lyonse tufwile ukufumya ifyebo ifyashinikishiwa ku musha Lesa asala, te ku bantu ukupitila pa intaneti.—Mat. 24:45.
6 Amaadresi ya pa Intaneti (Internet Web Sites): Twalikwata adresi pa intaneti, apo tubika ifyebo. Ne yi adresi ni: www.watchtower.org. Ifyebo ifyaba pali iyi adresi fingi ica kuti fyonse ifyo abantu balefwaya ukwishiba pa Nte sha kwa Yehova kuti bafisanga. Takuli umuntu nangu umo, komiti nelyo icilonganino icifwile ukupanga adresi imbi apo bafwile ukubika ifyebo ifilanda pa Nte sha kwa Yehova. Bamo balibika ifyebo ifyaba mu mpapulo shesu pamo na malembo pa intaneti ukubikapo fye no mufumine ifyebo fyonse. E lyo balabikapo fye ne fyebo ifiba pa mabungano no kweba bonse abalebelenga ukusangwilako. Nampo nga balasangamo icibwesha nelyo iyo, ukukopolola ifyebo ifyaba mu mpapulo sha Nte sha kwa Yehova no ku fisalanganya ku bantu bambi pa intaneti kutoba ifunde. Bamo bamona kwati ukucita ifyo ninshi baleafwa bamunyinabo, lelo tabakwata insambu kanshi bafwile ukuleka ukucite fyo.
7 Ishibeni Ifimuposela Inshita: Libili libili ifwe bonse tufwile ukumona ifyo tulebomfya inshita yesu. Baibolo itukoselesha ukuti: “Cenjeleni ukuti ukwenda kwenu takuli ngo kwa bawelewele iyo kano nga ba mano, ukuilubwile nshita mwe bene, pantu ishi nshiku sha bubifi.” (Efes. 5:15, 16) E ico kanshi mufwile ukutontonkanya na pa mafya ayaba mu kubomfya ifya kumfwaninamo ifileya filelundulukilako fye. Kwena amakompyuta na fimbi ifyo tubomfya fyaliba fye bwino, lelo kuti fyaleta amafya nga ca kutila filetulila nshita.—1 Kor. 7:29, 31.
8 Tufwile ukuipusha ukuti: ‘Bushe ndapoosa inshita cila bushiku ukulembeshanya na bambi pa kompyuta ifintu ifinenga fye ukusakamikwa? Bushe njikalila fye ukutuma amafoni nelyo ukutuma ifyebo ifishacindama pali foni? (1 Tim. 5:13) Bushe ndapoosa inshita iikalamba pa intaneti ukwabula ne fyo ndefwayapo ifine fine nelyo bushe njikalila fye ukwisula TV no kulafwayafwaya apa kutamba? Bushe ndangala sana ifyangalo fya pa kompyuta nelyo ifya pali foni ica kuti ndafilwa no kulabelenga Icebo ca kwa Lesa?’ Ukukonkelela ifi fintu kuti kwalenga panono panono twaleka ukupepa Lesa.—Amapi. 12:11.
9 Ukubomfya bwino ifya kumfwaninamo kukalenga tukaletontonkanya pa fintu “ifyaumo mutengo kabili ifyawama.”—Amapi. 24:4.