Ibukisheni Abakoloci ba Busumino
1 Ana uwali ne myaka 84, nangu ca kutila ali mukamfwilwa kabili umukote, “talefuma pe tempele.” Ubusumino bwakwe bwalengele Yehova ukumupaala mu nshila yaibela. (Luka 2:36-38) Pali lelo, bamunyinefwe na bankashi yesu abengi baba nga filya Ana ali te mulandu na mafya bakwata. Ilyo aba aba busumino baleshomboka na malwele nelyo ukufilwa ukucita fimo pa mulandu wa bukote, napamo limo limo kuti balefuupulwa. Natumone inshila shimo isho twingabakoseleseshamo no kubafwa ukutwalilila ukubomba bwino lwa ku mupashi.
2 Ukulongana no Butumikishi: Nga ca kuti bambi baitemenwa ukubateyanishisha imyendele, abakoloci ba busumino abengi kuti cabangukila ukusangwa ku kulongana kwa Bena Kristu lyonse. Ici cilenga aba babomfi ba busumino, ababomba imyaka iingi ukukuulililwa lwa ku mupashi kabili icilonganino na co cilamwenamo. Bushe mwalibombako uyu mulimo ushaiwamina?—Heb. 13:16.
3 Ukubombako lyonse ubutumikishi kulenga Abena Kristu ba cine ukuba ne cimwemwe no kuumfwa bwino. Lelo, cilafya ku bakote na balwalilila ukubombe fyo. Bushe aba batemwikwa kuti babombako na imwe ‘ngo mubomfi munabo’ mu musango umo uwa mulimo wa kushimikila? (Rom. 16:3, 9, 21) Napamo kuti mwabepusha ukubomba na imwe mu bunte bwa pa lamya nelyo ukuya na imwe ku cipempu ca kubwelelamo nelyo kwi sambililo lya Baibolo. Nga ca kuti abakoloci bekala fye pa ng’anda, bushe kuti mwaeba umusambi wa Baibolo ukulaisa pali iyo ng’anda e po mulesambililila?
4 Ukusambilila no Kubishanya: Limo limo, bamo balalaalika abakoloci nelyo abalwalilila ukusangwako pe sambililo lya lupwa, nangu fye ukukwatila isambililo mu ng’anda ya abo bantu. Nyina umo asendele abana bakwe abanono babili ku ng’anda ya kwa nkashi umukoloci ku kuyasambilila mu lupapulo lwa Icitabo Candi ca Malyashi ya mu Baibolo, kabili kulya kubishanya kwakoseleshe bonse. Aba musango yo balomfwa bwino nga babalaalika na ku ca kulya nelyo ku kwisha fye. Nga ca kuti abalwele balinaka sana ica kuti teti baye ku kwisha nga balaalikwa, napamo kuti mwabatuminako foni nelyo mwabapempulako pa nshita inono ku kubabelengelako, ukupepa nabo nelyo ukubashimikilako fimo ifingabakuulilila.—Rom. 1:11, 12.
5 Yehova alicindika sana abakoloci ba busumino. (Heb. 6:10, 11) Kuti twamupashanya pa kubalanga ukuti twalibacindika no kubafwa ukutwalilila ukubomba bwino ifya ku mupashi.