Umukululo wa Fipusho

◼ Ni lilali cilinga ukupanga ibumba lya bantu abalanda ululimi lwa ku calo cimbi?

Nga ca kuti mu cifulo icilonganino cishimikila muli abantu abengi abalanda ululimi lwa ku calo cimbi, baeluda bafwile ukuteyanya umulimo wa kushimikila muli ulo lulimi. (km 7/02 ibu. 1; km 2/98 amabu. 3-4) Nalimo kuti caba ukuti abo bantu abalanda ululimi lwa ku calo cimbi baba mu fifulo fyatalukana umo ifilonganino fibili nelyo ifyafulilako fishimikila. Nga cabe fi, kangalila wa muputule akamweba ifya kucita, ukucite fi ku kwafwa ifyo filonganino ukubombela pamo mu mulimo wa kushimikila. Mu nshita mu nshita, kuti kwaba ukuyalandako ilyashi lya ku cintubwingi nelyo Isambililo lya Ulupungu lwa kwa Kalinda pa kuti kwingaba ukumona impendwa ya bantu abalesangwa ku kulongana kwa mu lulimi lwa ku calo cimbi.

Ibumba lya balanda ululimi lwa ku calo cimbi kuti lyapangwa nga ca kuti ifi filekabilwa fyabako: (1) Nga kuli bakasabankanya nelyo abalefwaya ukusambilila abomfwikisha imbila nsuma mu lulimi lwine ulo. (2) Nga kuli eluda wafikapo nelyo umubomfi utumikila uwa kutungulula ukulongana nangu fye kumo ukwa cila mulungu. (3) Nga kuli ibumba lya baeluda abaitemenwe ukutungilila ili bumba. Nga ca kuti ifi ifilekabilwa fyabako, baeluda bafwile ukweba iofesi lya musambo pa kuti iofesi lishibe ili bumba na pa kuti bapeelwe ubutungulushi bumbi.

Amabumba ayengi yatendekela no kukwata Isambililo lya Citabo pa Cilonganino cila mulungu. Pa numa, baeluda kuti basuminisha ukulundako ukulongana kumbi, pamo nga Ukulongana kwa pa Cintubwingi ne Sambililo lya Ulupungu lwa kwa Kalinda. Amalyashi Na. 2, 3, na 4 aya mwi Sukulu lya Butumikishi Ilya Bulesa kuti yalandwa mu muputule umbi nga ca kuti eluda wafikapo nelyo umubomfi utumikila uwaishiba ulo lulimi kuti aba nga katungulula we sukulu. Lelo, ili bumba lili no kuilunda ku cilonganino ilyo kuli ilyashi lya kufunda, ifishinka fikalamba ifya Baibolo, no Kulongana kwa Mulimo. Kabili kuti kwaba no kuteyanishisha ili bumba umulimo wa mwi bala.

Bonse mwi bumba bakonka ubwangalishi bwe bumba lya baeluda. Baeluda bafwile ukupeela ubutungulushi bushaumina kumo no kupoosako amano ku kusakamana ifyo ili bumba lilekabila. Ilyo kangalila wa muputule atandalila icilonganino cangalila ili bumba, ali no kutantika ukubomba ne li bumba pa kuti alikoshe lwa ku mupashi. Kwi paalo lya kwa Yehova, ili bumba lya balanda ululimi lwa ku calo cimbi kuti lyasuka lyaba cilonganino.