Ukwafwa pa Nshita Yalinga
1 Ilyo umutumwa Petro amwene ukuti alekabila ukukoselesha abasumina banankwe, ukwangwako kwakwe kwalimukuntile ukubacinkulako mu kutemwa no kubakoselesha. (2 Pet. 1:12, 13; 3:1) Acincishe ‘abapokelele icitetekelo’ ukutwalilila ukukula mu mibele ya ku mupashi pa kuti tabalengelwe “aba fye nelyo abashitwala ifisabo mu kwishiba bwino bwino Shikulwifwe Yesu Kristu.” (2 Pet. 1:1, 5-8) Petro alefwaya ukubafwa ukushininkisha ubwite bwabo no kusalwa kwabo kuli Yehova, pa kuti napamo “[bakasangwe] ababula akabi kabili ababula akalema kabili mu mutende.” (2 Pet. 1:10, 11; 3:14) Ku bengi, ukukoselesha kwakwe kwali kwafwa kwaishile pa nshita yalinga.
2 Pali lelo, bakangalila ba Bwina Kristu e fyo na bo bayangwa abantu ba kwa Lesa. Muli shino “nshita shaibela ishayafya,” ababomfi ba kwa Yehova abengi bafwile ukushipikisha imibele yayafya. (2 Tim. 3:1) Pa mulandu wa mafya ya lyonse aya ndalama, aya mu lupwa, nelyo na ya pa lwabo, bamo kuti baumfwa nge fyaumfwile Davidi ati: “Ifibi fyanshinguluka fyasuka fyabulo kupendeka, amampuulu yandi yansanga, no kuleka mfilwe ukupunama; yaba ayengi ukucile nseke sha mushishi wa ku mutwe wandi, no mutima wafuma.” (Amalu. 40:12) Aya mafya kuti yabafinina ica kuti aba musango yo kuti nalimo balekelesha imilimo yacindama iya ku mupashi no kuleka ukubombako ubutumikishi bwa Bwina Kristu. Lelo, te mulandu na mafya bakwete, ‘amafunde ya kwa Yehova tabalaba.’ (Amalu. 119:176) Ino e nshita yalinga kuli baeluda ukwafwilisha ba musango yo.—Esa. 32:1, 2.
3 Pa kucite fi, baeluda balekoseleshiwa ukubombesha nga nshi ukwafwilisha abo pali nomba abashilebombako umulimo wa kushimikila. Ukubombesha kukalamba ku kupwishishisha ici nakutendeka kabili kukatwalilila mu mweshi onse uwa March. Bakangalila wa masambililo ya fitabo bafwile ukutandalila abanaka ku kubafwilisha lwa ku mupashi ukuba no buyo bwa kubafwilisha ukutendeka ukubomba cipya cipya ne cilonganino. Nga cakabilwa, kuti napamo mwabatantikila isambililo lya Baibolo. Bakasabankanya bambi kuti baebwa ukwafwilisha. Nga bamweba ukucite ci, ukubombesha kwenu kukanonsha sana, maka maka nga mulekoselesha mu mutembo, mu kulangulukilako.
4 Tulaba ne nsansa ilyo umuntu atendeka ukubomba cipya cipya ne cilonganino. (Luka 15:6) Ukubombesha kwesu ukukoselesha abaleko kushimikila nakalimo kuti cine cine kwalenga “icebo icasoswa apayene.”—Amapi. 25:11.