Icebo ca kwa Lesa Cishinka
1. Fyebo nshi ifyacindama ifyaba mu Baibolo?
1 Kemba wa malumbo alembele ati: “Ukusupulwa kwa cebo cenu cishinka.” (Amalu. 119:160) Yehova ukupitila mu Cebo cakwe icapuutwamo, alatupeela ifyasuko ku mepusho yacindamisha aya mu bumi. Alasansamusha abacushiwa no kubapeela isubilo. Kabili atulanga ifyo twingapalama kuli wene. Umwanakashi umo uutasha atile: “Ukusambilila icine ca mu Baibolo caba ngo kufuma umufiitile kabili umwabipa no kwingila mu muputule umwabuuta kabili umusuma.” Bushe mulesha ukwebako bambi icine ca mu Cebo ca kwa Lesa ponse apo mwaba ne shuko?
2. Bushe Baibolo iwamya shani imikalile ya bantu?
2 Amaka ya Baibolo aya Kwalula Abantu ne fyo Ikuma aba mwi Sonde Lyonse: Icine ca mu Baibolo calikwata amaka ya kufika abantu pa mitima no kubaalula. (Heb. 4:12) Umukashana we shina lya Rosa aali cilende, kabili alekolwa no kubomfya imiti ikola. Atila: “Bushiku bumo, ilyo napelelwe icine cine, Inte shibili, umulume no mukashi, balandile na ine pa fyo Baibolo ingatwafwa ukupikulula amafya yesu. Natendeke ukusambilila Icebo ca kwa Lesa kabili nalitemenwe ifyo nalesambilila. Mu mweshi fye umo nalikwete ubukose bwa kwalula imibele yandi no kutendeka ukwikala imikalile isuma. Nomba apo nalikwete ubuyo mu bumi, nshalekabila ubwafwilisho ukufuma ku bwalwa nelyo imiti ikola. Kabili apo nalefwaisha ukubomba ifingi pamo nga cibusa wa kwa Yehova, napampamine pa kulakonka ifipimo fyakwe mu mikalile yandi. Akubula amano yene yene aya mu Cebo ca kwa Lesa, pali ino nshita kwena nga nali-ipaya kale.”—Amalu. 119:92.
3. Mulandu nshi tushifwile ukushimbila ukwebako bambi ubukombe bwa mu Baibolo?
3 Baibolo tayaba nga mabuuku ayengi aya lelo, yena ikuma abantu aba ‘mu nko shonse, imitundu, na bantu ba ndimi.’ (Ukus. 7:9) Ukufwaya kwa kwa Lesa kwa kuti “abantu ba misango yonse bakapusuke no kufika ku kwishiba bwino bwino icine.” (1 Tim. 2:4) E ico, tatufwile ukutunganya ukuti umuntu takutike ku mbila nsuma pa mulandu fye wa cikulilo cakwe. Lelo, shimikileni ubukombe bwa Bufumu kuli bonse, ukubomfya Baibolo mu kulungatika nga cingacitika.
4. Kuti twabomfya shani Baibolo pa kucito bunte?
4 Komaileni pa Malembo: Kwaba inshita ishingi isho twingabomfya Baibolo mu butumikishi. Pa kushalika bamagazini, esheni ukubelengako ilembo lili mu fya kulanda pali magazini muleshalika. Pa kutambika ulupapulo lwa kushalika mu mweshi, bamo basanga ukuti pa ntendekelo, e pawama ukubelengako ilembo ilyo basala bwino bwino. Pa fipempu fya kubwelelamo, belengeni ilembo limo nelyo ayafulilako lyonse ilyo mwabwelelako pa kuti mwafwilishe mwine ng’anda ukunonka ukwishiba kwine kwine panono panono. Pa kutungulula isambililo lya Baibolo, tontomesheni sana pa malembo yapulilemo. Ilyo mushili mu butumikishi bwa lyonse, mulekwata Baibolo mupepi pa kuti mwingaibomfya nga kwaba ishuko lya kucita ubunte bwa mu lyashi.—2 Tim. 2:15.
5. Mulandu nshi tufwile ukwesesha na maka ukubomfya Baibolo mu butumikishi bwesu?
5 Shi natwafwe bambi ukunonkelamo mu maka yatuninkisha aya Cebo ca kwa Lesa ica cishinka ukupitila mu kubomfya Baibolo pa nshita yonse twashukila mu butumikishi bwesu.—1 Tes. 2:13.