Bomfyeni Bwino Baibolo
1. Finshi mulingile ukucita pa kuipekanishisha ukuya mu mulimo wa kubila?
1 Te mulandu no lupapulo tulefwaya ukushalika ilyo tuli mu mulimo wa kubila, cilawamisha ukubelenga ilembo ilya kulenga abaletukutika ukutontonkanya pa fyo tulelanda. (Heb. 4:12) Ukubelenga ilembo ilili mu lupapulo muleshalika kukamwaafwa sana ukwalukila ku lupapulo lwine muleshalika. Mu ncende shimo, bakasabankanya basanga ukuti cilaba bwino ukusenda Baibolo ku minwe ilyo baleya mu kulanda no muntu nelyo ilyo balebomba ku ng’anda ne ng’anda.
2. (a) Kuti twacita shani pa kutendekela ukulanshanya ne lembo? (b) Lyashi nshi ilya mu Malembo ilyo abantu ba mu cifulo mubombela batemwa ukukutikako?
2 Tendekeleni ne Lembo: Pa kutendeka ukulanshanya, bakasabankanya bamo bepusha mwine ng’anda ilipusho lyayanguka ilikumine ilembo lya mu Baibolo ilyo bapekenye ukubelenga. Lyena balabelenga Baibolo. Ici cilenga ukuti balukile ku Cebo ca kwa Lesa mu kwangufyanya. Bushe intendekelo shakonkapo kuti shabomfiwa bwino mu cifulo cenu ica kubombelamo?
◼ “Nga mwalikwete amaka ya kucita ifi, bushe kuti mwayalula ifintu muli uyu musango?” Belengeni Ukusokolola 21:4.
◼ “Cinshi tuleikalila mu nshita shaibela ishayafya nga shino?” Belengeni 2 Timote 3:1-5.
◼ Bushe ubwikashi bwesu kuti bwawama nga ca kuti abantu bonse balekonka uku kupanda amano?” Belengeni Mateo 7:12.
◼ “Bushe abana benu kuti baisaikalako mu bwikashi bulondolwelwe pano?” Belengeni Amalumbo 37:10, 11.
◼ “Bushe kukatala akuba inshita ilyo aya mashiwi yakafishiwapo?” Belengeni Esaya 33:24.
◼ “Bushe mwalitala amubelengapo aya mashiwi yalanda pa kwaluka kwa mitekele ayasangwa pali ili lembo?” Belengeni Daniele 2:44.
◼ “Bushe mwalitala amufwayapo ukwipusha Lesa ili lipusho?” Belengeni Yobo 21:7.
◼ “Bushe kukabako inshita ilyo tukamona abatemwikwa besu abaafwa na kabili?” Belengeni Yohane 5:28, 29.
◼ “Bushe abaafwa baleshiba ifyo aba mweo balecita?” Belengeni Lukala Milandu 9:5.
3. Bushe kuti twayafwa shani abantu ukumfwikisha ilembo lya mu Baibolo twababelengela?
3 Londololeni, Langilileni, Bafweni Ukumona Ifyo Fibakumine: Umuntu nga aitemenwa ukulanshanya na imwe, mwilanshanya nankwe lubilo lubilo. Tekeni umutima pa kuti mu mulondolwele, mulangilile, e lyo no kumwafwa ukumona ifyo ilembo mubelengele limukumine pa kuti omfwikishe. (Nehe. 8:8) Abantu nga baumfwikisha no kusumina mu fyo Icebo ca kwa Lesa cisambilisha, imikalile yabo kuti yayaluka icine cine.—1 Tes. 2:13.
4. Kuti twabomfya shani bwino Baibolo ilyo tulecita ifipempu fya kubwelelamo?
4 Twalilileni ukubomfya bwino Baibolo ilyo muleyafwa bambi ukumfwikisha Icebo ca kwa Lesa. Kuti mwabomfya inshila imo ine ilyo mulecita ifipempu fya kubwelelamo: (1) Saleni ilembo ilyalinga. (2) Ipusheni ilipusho lyayanguka ilikumine ifyo ilembo musalile lilelandapo. Lyena belengeni ilembo. (3) Londololeni, langilileni, kabili bafweni ukumona ifyo libakumine. Lyonse ilyo mwabatandalila, muletukuta ukubafwa ukwishibilapo na fimbi pa Cebo ca kwa Lesa. Nga mulecita ifi, nalimo kuti mwatendeka ukutungulula isambililo lya Baibolo bwangu bwangu!