Beni Aba Mukoosha mu Kushimikila
1 Tuli mu nshiku shayafya. Inkondo sha bana calo, inkondo sha mishobo, amasanso yalengwa ne fyabumbwa pe sonde ne fintu fimbi ifyabipa nafiseeka icine cine. Pali lelo abantunse balekabila ukumfwa imbila nsuma ukucila na kale lyonse. Lelo, abantu abengi tabangwako sana ku fintu fya ku mupashi. Mu ncende shimo, kuti nalimo cayafya ukusanga abantu pa mayanda kabili cilacila ukwafya ukusanga abantu abengakutika kuli ifwe nelyo abengatemwa ukusambilila Baibolo. Nangu cibe ifyo, calicindama ukuti tube aba mukoosha mu kubila imbila nsuma iya Bufumu bwa kwa Lesa ubuleteka mu muulu.—Mat. 24:14.
2 Ukutemwa Abantu: Umulimo wesu uwa kushimikila ulangilila ukuti Yehova alitemwa sana abantu. “Tafwaya umuntu nangu umo ukonaulwa lelo afwaya bonse bafike ku kulapila.” (2 Pet. 3:9; Esek. 33:11) E ico Lesa alisosa nge fyo Yesu asosele ukuti “imbila nsuma ili no kushimikilwa intanshi mu nko shonse.” (Marko 13:10) Lesa alapaapaata abantu ukubwelela kuli wene pa kuti bakesepusuka ubupingushi buleisa pa calo ca kwa Satana. (Yoele 2:28, 29, 32; Sefa. 2:2, 3) Bushe tatutasha ukuti Yehova alitupeela ili shuko lya kupusuka ubupingushi buleisa pa calo ca kwa Satana?—1 Tim. 1:12, 13.
3 Lipoti wa calo conse uwa mwaka wa mulimo uwa 2004 alangilila ukuti amasambililo ya Baibolo ukufika kuli 6,085,387 yaletungululwa cila mweshi kabili abasambi ukufika kuli 5,000 e balebatishiwa cila mulungu! Bamo pali aba abapya abaipeela basangilwe pa mulandu we paalo lya kwa Yehova pali bakasabankanya abaali no mukoosha, abaipamfishe ukulanda no uli onse mu cifulo cabo ica kubombelamo. Ici calilenga ifilonganino ifingi ukusekelela, kabili lishuko ukuba kabomba munankwe wa kwa Lesa muli uyu mulimo wa kupususha abantu!—1 Kor. 3:5, 6, 9.
4 Ukulumbanya Ishina lya kwa Lesa: Tulatwalilila ukuba aba mukoosha mu kushimikila pa kuti tulumbanye Yehova ku bantu abengi no kushisha ishina lyakwe ku bantu bonse. (Heb. 13:15) Satana alilufya “aba pano isonde bonse;” ukubalenga ukucetekela ukuti Lesa takwata amaka ya kupwisha amafya ya bantunse, no kuti tapoosako amano ku kucula kwa bantunse, nelyo fye ukuti Lesa tabako. (Ukus. 12:9) Ilyo tuleshimikila tulalanda icine pa lwa kwa Shifwe wa ku muulu uwapuulamisha. Shi natutwalilile ukulumbanya ishina lyakwe pali nomba na ku ciyayaya.—Amalu. 145:1, 2.