Ulubali 9—Ukutungulula Amasambililo ya Baibolo Ayalunduluka
Ukusambilisha Abasambi Ifya Kushimikila Ubunte bwa mu Lyashi
1 Lintu fye Andrea na Filipi baishibe ukuti Yesu ali e Mesia walailwe, tabashingashingile ukulanda kuli bambi pali ili lyashi lya nsansa. (Yoh.1:40-45) Na lelo line cimo cine, lintu abasambi ba Baibolo batetekela ifyo balesambilila, balafwaisha ukwebako bambi. (2 Kor. 4:13) Kuti twabakoselesha shani ukulashimikila ubunte bwa mu lyashi kabili no kubafwa ukuba abafikapo?
2 Kuti mwaipusha umusambi nga ca kuti alilandako na bantu bambi pa fintu asambilila mu Baibolo. Limbi kuti alaalika ifibusa nelyo aba lupwa ukusangwapo lintu mulesambilila. Ipusheni umusambi nga kwalibako abo abomba na bo, abo asambilila na bo, nelyo abo angala na bo abafwaya ukusambilila. Nga atampa ukulaalikako bambi ukusangwapo pe sambililo kuti camwafwa ukutendeka ukushimikila. Afweni umusambi ukuba uwa mucetekanya, uwa mucinshi kabili uwafuuka lintu alelanda na bambi pali Yehova Lesa no kufwaya kwakwe.—Kol. 4:6; 2 Tim. 2:24, 25.
3 Ukwebako Bambi Ifyo Balesambilila: Calicindama ukusambilisha abasambi ukubomfya Baibolo pa kulanda pa fyo balesambilila. Nga mwafika pa fishinka fimo ilyo mulesambilila, ipusheni umusambi ukuti: “Kuti mwabomfya shani Baibolo pa kulanda pa cine cintu mulesambilila ku lupwa lwenu?” nelyo “Lilembo nshi mwingabelengela abanenu pa kushininkisha ici cishinka?” Umfweni fintu alalanda, lyene mulangeni ifya kubomfya Amalembo lintu alesambilisha. (2 Tim. 2:15) Nga mulecita ifyo ninshi mulepekanishisha umusambi ukulashimikila ubunte bwa mu lyashi kabili, mulemupekanishisha no kushimikila lintu akafikapo ukuba kasabakanya uushabatishiwa.
4 Cisuma ukupekanishisha abasambi ba Baibolo ukulolenkana no kupakaswa. (Mat. 10:36; Luka 8:13; 2 Tim. 3:12) Lintu bamo baipusha ifipusho nelyo ukulanda pa Nte sha kwa Yehova, ici kuti cayafwa abasambi ukushimikila. Broshuwa wa Inte sha kwa Yehova—Ni Bani? Finshi Basuminamo? kuti yabafwa ukuba “abaiteyanya ukuisosela.” (1 Pet. 3:15) Yalikwata ifyebo ifyalungama ifyo abapya bengabomfya ku kwafwa ifibusa na ba lupwa ukwishiba ifyo twasuminamo ifyashimpwa pali Baibolo e lyo ne milimo tubomba.