Ukutantika kwa Lupwa—Ukushimikila Pamo ngo Lupwa
1 Yehova alatemwa ukumona abacaice balelumbanya ishina lyakwe. (Amalu. 148:12, 13) Lintu Yesu ali pano isonde ‘utunya no twaleonka twalumbenye’ Lesa. (Mat. 21:15, 16) Na lelo line ici cilecitika. Mwe bafyashi, kuti mwayafwa shani abana benu ukukula abapimpa mu kulumbanya Yehova mu mulimo wa kushimikila? Na kabili, nga fintu cikomailwepo mu cipande cili pa muulu icilelanda pa kulongana kwa cilonganino, icacindama sana ca kumwenako cenu mwe bafyashi. Wishi umo alandileko abafyashi bonse lintu atile: “Abana tabacita cintu mwe bafyashi mulebeba ukucita, bacita cintu balemona mulecita!”
2 Nkashi uwakushiwe na bafyashi batiina Lesa aibukishe ukuti: “Pa Cibelushi ulucelo tatwabalile atwipusha nga twali no kuya mu kushimikila. Pantu twalishibe ukuti tuleya.” Na imwe bene, kuti mwasambilisha abana fintu umulimo wa kushimikila wacindama nga ca kuti cila mulungu mulefumina mu mulimo pamo ngo lupwa. Te bana beka bakasambilila kuli imwe mwe bafyashi pa kumona ifyo mulecita lelo ici cikafwa na imwe ukumona imibele ne imisango ya bana, ne mishimikilile yabo.
3 Ukubakansha Panono Panono: Abacaice pa kuipakisha ukushimikila, balekabila ukubapekanya pa kuti babombe bwino. Nkashi alandilwepo mu kubangilila kabili atile: “ Tatwabalile atupatikishiwapo ukukonka abafyashi mu mulimo wabo. Twalishibe ukuti na ifwe mulimo wesu, nampo nga kukonkonsha fye pa ciibi atemwa ukushalika trakiti. Ukupitila mu kupekanishisha bwino mu kubangilila, twaleishiba ifyo twaleya mu kulanda.” Kuti mwakansha abana benu cimo cine nga mulebapekanishisha ukuya mu kushimikila. Kuti mwacita ifyo limbi pa nshita ye sambililo lya lupwa nelyo inshita imbi.
4 Ukushimikila pamo ngo lupwa kupeela abafyashi ishuko lya kufundisha abana icine. Umwina Kristu umo alesenda umwana wakwe umukashana mu kushalika amatrakiti ku mushi umo uwali apalepele amakilomita 10. Umukashana atila: “Cali ni lintu twaleenda pali isho nyendo e lyo batata bangafwile ukumfwikishe cine.” (Amala. 6:7) Na imwe bene ipakisheni amapaalo yaba mu kutantika umulimo wa kushimikila ngo lupwa cila mulungu.