Afweni Abana Benu Ukulunduluka mu Mulimo wa Kushimikila

¹ Abafyashi ba Bwina Kristu balikwata umulimo uwacindama sana uwa kusambilisha bana babo ifya kushimikila ilyo bacili abanono. Kwaba inshila ishingi isho bengacitilamo ifi. Abana bamo balalanda ilembo baswatila ninshi tabalatendeka no kubelenga. Ici kuti calenga bakomfwa ukukutika sana. Lintu abana baleya balekula, kuti balebomba sana mu mulimo. Mwe bafyashi kuti mwaafwa shani abana benu pa kuti balebombako umulimo wa kushimikila? Nalimo ifyebo fyakonkapo kuti fyamwaafwa.

² Pa numa ya kuposha, nalimo kuti mwatila:

◼ “Umwana wandi, [landeni ishina lyakwe], alefwaya ukumubelengela ilembo ilisuma sana.” Umwana wenu napamo kuti atila: “Ili lembo lyaba mwi buuku lya Amalumbo lyalinsambilisha ishina lya kwa Lesa. [Umwana abelenga ilembo lya Amalumbo 83:18 nelyo alanda fye ku mutwe.] Bamagazini aba balanda pa fyo Yehova Lesa akatucitila. Bushe kuti namushiila?” Pa kusondwelela ukulanshanya londololeni ukufuma indalama sha kwafwilisha umulimo wesu uwa mwi sonde lyonse.

³ Nelyo kuti mwatila:

◼ “Mwapoleni mukwai. Ndesambilisha umwana wandi, [landeni ishina lyakwe], ifya kusakamana abantu. Alefwaya mumfweko amashiwi ayanono ayaba mu Baibolo.” Nalimo kuti atila: “Inshila imo natemwa ukwafwilamo abantu, kubeeba ifyo Baibolo yalanda pa fikacitika ku ntanshi. [Umwana abelenga Ukusokolola 21:4. nelyo alanda fye ku mutwe.] Aba bamagazini balanda ifyo Ubufumu bwa kwa Lesa bukatucitila. Ninjishiba mwalaipakisha ukubelenga.”

⁴ Ukubomfya inshila yayanguka lyonse pa kushimikila kukalenga abana ukuicetekela lintu baleshimikila ubukombe bwa Bufumu. Nga mwalapitulukilamo kabela na bana mu fyo bengalanda bwino ne fyo bengakosha ishiwi, mukabafwa ukulanda bwino apali ponse. Ukupekanya bwino no kutasha abana icine cine kukabafwa ukulondolola ifyo basumina.

⁵ Ukukoselesha kwa musango uyo kwalilenga abana abanono abengi ukufikapo ukuba bakasabankanya abashabatishiwa. Ala mwandini tulaba aba nsansa ukumona abana besu balelunduluka mu mulimo wa Bwina Kristu!—Amalu. 148:12, 13.