Ukubila Imbila Nsuma ku Bantu Abengi
1. Finshi Abena Kristu ba kubalilapo bacitile pa kuti babile imbila nsuma ku bantu abengi?
1 Abakonshi ba kwa Yesu aba kubalilapo balipooseleko sana amano ku kubila ubukombe bwa Bufumu. Balibomfeshe inshila ishisuma pa kuti imbila nsuma ifike ku bantu abengi. Abena Kristu balembeleko Baibolo, balembele ifyebo fyabo mu ciGriki caishibikwe ku bengi, icalelandwa mu fyalo ifyo ubuteko bwa bena Roma bwaleteka. Kabili, bakabilisha bacincila aba mu myaka ya ba100 na ba200 C.E. bafwile e balebomfya sana Codex, icitabo icayangwike ukubomfya pa kufwaya amalembo ukucila ifimfungwa.
2, 3. (a) Bushe Esaya 60:16 alefikilishiwa shani muno nshiku? (b) Bushe ifya kupangapanga balefibomfya shani mu kulundulula ukupepa kwa cine?
2 Ukubomfya Ifya kupangapanga: Yehova alandile ukupitila muli kasesema Esaya ukuti: “Ukoonke bele lya nko.” (Esa. 60:16) Mu kufikilishiwa kwa muno nshiku ukwa ubu busesemo, ababomfi ba kwa Yehova balebomfya ifisuma ifyapangwa ne nko mu kulundulula umulimo wa kushimikila. Natulangilile, mu 1914, ilyo ukubomfya ifikope ifisela takulaseeka sana, Abasambi ba Baibolo batendeke ubunkolanya baleita ati,“Photo-Drama of Creation.” Ifi fikope fisela na masilaidi ayabalabata kabili ifyabamo ifiunda ifyo balelangisha pa maawala 8, fyalengele abantu abengi sana bashimikilwa.
3 Ino nshita, abantu ba kwa Lesa babomfya bamashini abapulinta ifingi mu nshita fye iinono e lyo na bakompyuta pa kupilibula amaBaibolo ne fitabo fya Baibolo mu ndimi ishingi. Ifya kwendelamo ifibutukisha filasenda impapulo sha Baibolo ukuya ku fifulo ifyaba ukutali sana pano calo mpaka fyafika ku bantu mu fyalo 235. Yehova, ukupitila mu mupashi wakwe, alilenga ababomfi bakwe ukubomfya bwino ifya kupangapanga ifya musango uyo, ne ci calenga icine ca mu Baibolo ukufika ku bantu abengi ukucila ifyo cali kale.
4. Bushe bamo bayalula shani imikalile yabo pa kutila bashimikile imbila nsuma ku bantu abengi?
4 Ukwalula Imikalile: Bakapepa ba cine na bo balyalula imikalile yabo pa kutila babile imbila nsuma ku bantu abengi. Bakapepa abengi balyangusha imikalile pa kuti babombeshe mu mulimo wa kushimikila. Bamo balikuukila uko bakabila ba Bufumu bakabilwa sana. Bambi na bo balilundulula ubutumikishi bwabo ukupitila mu kusambilila ululimi lumbi.
5, 6. Cinshi twingacita pa kutila tulande na bantu abengi mu cifulo tubombela?
5 Cimbi ico na ifwe twingacita pa kuti tubile imbila nsuma ku bantu abengi, kubashimikila lintu bali pa ng’anda na konse uko bengasangwa. Nga ca kutila ulucelo na kasuba tamusanga abantu mu cifulo mushimikila, bushe mulalula inshita yenu no kushimikila mu cungulo? Bushe kwaliba ififulo mwingashimikilamo umusangwa sana abantu? Bushe mwalyeshapo ukushimikila pa foni na mu fifulo fya makwebo? Bushe mulashimika ubunte mu lyashi fye?
6 Ala lipaalo ukubomba umulimo wacindama uwa kucitilo bunte kwi shina lya kwa Yehova no Bufumu bwakwe! Natutwalilile ukwebako abantu abengi icine icipeela ubumi icisangwa mu Cebo ca kwa Lesa.—Mat. 28:19, 20.