‘Ifintu Fyonse Citileni Imbila Nsuma’
1. Finshi kashimikila wa Bufumu afwaya ukucitila bambi, kabili mulandu nshi?
1 Umutumwa Paulo aishibe ukuti ukubila imbila nsuma kuli bambi e mulimo alekabila ukubomba. (1 Kor. 9:16, 19, 23) Na ifwe bene ukufwaya ukuti abantu bakamwenemo ku ciyayaya kulatulenga ukubombesha ukubashimikila imbila nsuma.
2. Ilyo tuleshimikila, finshi tufwile ukwalukamo, kabili mulandu nshi?
2 Muleshimikila Ukusangwa Abantu na pa Nshita iyo Bengasangwa: Umulondo uwaishibisha ukwipaya isabi tapoosa isumbu lyakwe pa ncende cingamwangukila na pa nshita iyo umwine atemenwe, lelo apoosa pa ncende na pa nshita isabi ilingi lingekatwa sana. Na ifwe bene apo tuli “balondo ba bantu,” tufwile ukwalula imibombele yesu pa kuti tulesanga abantu mu cifulo tushimikila no kuipakisha nga nshi umulimo wesu uwa kwikata “isabi lya misango yonse.” (Mat. 4:19; 13:47) Bushe kuti twatandalila abantu pa mayanda mu cungulo bushiku atemwa bushe kuti twabombako ubunte bwa mu musebo mu nshita ya lucelo? Ubuyo bwa kwa Paulo bwali “kubila sana imbila nsuma,” kabili abomfeshe inshila ishalekanalekana pa kucite co.—Imil. 17:17; 20:20, 24.
3, 4. Ilyo tuli mu mulimo wa kushimikila, ni mu nshila nshi twingalwilamo imishimikile yesu, kabili finshi fingafuma mu kucite fyo?
3 Mulealula Inshila ya Kushimikilamo Ukulingana no Kukabila: Libili libili abalondo balalula inshila babomfya pa kuti bepaye umusango we sabi balefwaya. Kuti twashimikila shani imbila nsuma iya Bufumu ku bantu ba mu cifulo cesu ica kubombelamo mu nshila iya kuti na bo bene nabatemwa? Ilyo tulelanshanya, kuti twaesha ukuletamo ilyashi ilyo abantu bengatemwa ukumfwa e lyo tulekutikisha ku fyo balelanda pali ilyo lyashi. (Yako. 1:19) Nalimo kuti twabepusha icipusho icingalenga balondolola ifyo baletontonkanya. (Amapi. 20:5) Nga twacite fyo, tukalenga imishimikile yesu ukulafika sana abantu pa mitima. Paulo aishileba ‘ku bantu bonse nge fyo baali.’ (1 Kor. 9:22) Ukuipekanya ukwalula imishimikile yesu kwalicindama sana nga tulefwaya ukufika abantu pa mitima.
4 Ala cilaleta sana insansa ukwebako bambi “imbila nsuma iya fintu ifisuma”! (Esa. 52:7) Awe ‘ifintu fyonse natulecitila imbila nsuma’ pa kuti tuleshimikila ku bantu abengi nga nshi.—1 Kor. 9:23.