Ifya Kutendeka Amasambililo mu Citabo ca Baibolo Isambilisha

Fwe bengi kuti twatemwa sana ukutungulula isambililo lya Baibolo, nomba ifya kutendeka e fyafya. Icitabo cipya icitila Bushe Cinshi Baibolo Isambilisha? kuti catwafwa. Amashiwi ya ntendekelo ayalembwa pa mabula 3-7, yalembwa mu musango wa kutila, kuti mwatendeka ukulanshanya no mwine wa ng’anda muli ici citabo. Na bashilati babeleshe ukushimikila, bakulatendeka amasambililo ya Baibolo ukwabula no bwafya.

◼ Kuti mwasosa ifi nga mwabomfya ifyebo fili pe bula 3:

Nga mwalanda pa lyashi licitike, ilisakamike abengi mu cifulo mubombela, kuti mwalanga umwine wa ng’anda ifipusho ifili mu filembo ifyafita sana pe bula 3 no kumweba ukuti alandepo. Lyena kuti mwakupukula pa mabula 4-5.

◼ Nelyo limbi kuti mwabalilapo ukulanda pa fyaba pa mabula 4-5:

Kuti mwatila, “Bushe batini te kuti ciwame ifintu pa calo nga fyayaluka fyaba nge fi cili pali ifi fikope?” Nelyo limbi kuti mwaipusha amuti, “Bushe pali ifi ifili apa ifyo Lesa atulaya, ni cili kwi mwingafwaisha sana ukuti cicitike?” Kutikisheni ilyo baleasuka.

Nga ca kutila umwine wa ng’anda atemwapo sana ilembo limo, mulangeni ico Baibolo isambilisha pali ilyo lyashi ukubomfya amaparagrafu yali mu citabo ayalelanda pali ilyo ilembo. (Moneni umukululo uli pali lino ibula.) Lanshanyeni nga filya fine ciba pe sambililo lya Baibolo. Kuti mwacite fi pa kutandala kwa kubalilapo mu maminiti 5 ukufika ku maminiti 10 pa mwinshi wa ng’anda pene.

◼ Cimbi ico mwingacita, kulanshanya no muntu ifyaba pe bula 6 no kuleka alandapo:

Langeni umwine wa ng’anda ifipusho fili pe samba lye bula, e lyo mumwipushe amuti, “Bushe mwalitontonkanyapo pa mepusho yamo ayali apa?” Nga atemwapo icipusho cimo, kupukuleni pe bula apali paragrafu ikwete icasuko ca ico cipusho. (Moneni umukululo uli pali lino line ibula.) Ilyo mulelanshanya, ninshi muletungulula isambililo lya Baibolo.

◼ Kuti twabomfya paragrafu 7 pa kutendeka ukulangilila ifyo isambililo lya Baibolo liba:

Belengeni amasentensi ya kubalilapo yatatu pe bula 7, e lyo mukupukule pa cipandwa 3, no kubomfya amaparagrafu 1-3 ku kulangilila ifyo tusambilila. Umfwaneni ilyo mukesamonana na kabili ku kwisalanshanya ifyasuko fya fipusho fili mu paragrafu 3.

◼ Ifyo Mwingacita pa Kuti Mukabweleleko:

Ilyo mulepwisha isambililo lya kubalilapo, umfwaneni ukwisatwalilila ukulanshanya. Limbi kuti mwatila fye: “Muli iyi nshita iinono fye, twasambilila ico Baibolo isambilisha pa lyashi lyacindama nga nshi. Umuku ukakonkapo, kuti twaisalanshanya pali [mwebeni icipusho mukalanshanya]. Bushe umulungu uleisa, nkese pa nshita imo ine?”

Ilyo tulepalama ku bushiku bwa kwa Yehova, aletwalilila ukutusambilisha bwino ifyo twingabomba umulimo wesu. (Mat. 28:19, 20; 2 Tim. 3:17) Shi natulebomfya bwino ici citabo cipya icishaiwamina, ukutendeka ukusambilila na bantu Baibolo.

[Akabokoshi pe bula 3]

Ukulanshanya Amalembo Ayali pa Mabula 4-5

◻ Ukusokolola 21:4 (amabu. 27-8, amapara. 1-3)

◻ Esaya 33:24; 35:5, 6 (ibu. 36, para. 22)

◻ Yohane 5:28, 29 (amabu. 72-3, amapara. 17-19)

◻ Amalumbo 72:16 (ibu. 34, para. 19)

Ifyasuko ku Fipusho Fili pe Bula 6

◻ Mulandu nshi tuculila? (amabu. 108-9, amapara. 6-8)

◻ Bushe kuti twacita shani nga twaba na masakamika mu bumi? (amabu. 184-5, amapara. 1-3)

◻ Cinshi twingacita pa kuti mu lupwa lwesu mube sana insansa? (ibu. 143, para. 20)

◻ Cinshi cicitika nga twafwa? (amabu. 58-9, amapara. 5-6)

◻ Bushe tukabala atumona abantu besu abafwa na kabili? (amabu. 72-3, amapara. 17-19)

◻ Kuti twacetekela shani ukuti Lesa akacita fyonse ifyo alaya ukucita? (ibu. 24, para. 17)