Programu Na Imbi iya Kulongana Kwaibela

Pa mulandu wa kwisulamo umupashi wa mushilo, Abena Kristu ba kubalilapo balibombeshe na maka ukubila imbila nsuma ukufika ukutali nga nshi. (Imil. 1:8; Kol. 1:23) Programu na imbi iya kulongana kwaibela iya mu mwaka wa mulimo uwa 2007 iikalatila: ‘Obelweni nga nshi ne Cebo,’ ikatwafwa ukupashanya ica kumwenako cabo icisuma nga nshi—Imil. 18:5.

Imfumu David yalandile pa Cebo ca kwa Lesa aiti: “Ukushimika kwa kwa Yehova kwa cishinka, kulengo wapelwa amano ukubo wa mano.” (Amalu. 19:7) Iyi programu iyapekanishiwa bwino iya kulongana kwaibela ukwa bushiku bumo ukwa mu 2007, ikalanda sana pa bucindami bwa kubomfya Amalembo “pa kulungika ifintu” kabili ikatukoselesha ukulabomfya Icebo ca kwa Lesa pa kushimikila e lyo kabili ikatukoselesha no kubikako sana amano pa kusambilisha. (2 Tim. 3:16, 17) Iyi programu ikatulanga ifyo twingalamba ifimfokonshi no kuinonsha fwe bene nga tulekonka ifipope fyaba muli Baibolo cila bushiku. Na kabili ikatwafwa ukubomfya Icebo ca kwa Lesa ukwafwa imisepela e lyo na bashilakokola mu cine ukuba abakosa mu kupepa.

Mukashininkishe ukuti ilyo Programu iletendeka ninshi namufika, kabili mukalekutikisha. Mukalelemba ifishinka ifyo mwingabomfya mwe bene. Mulingile ukubikako amano ukulaumfwa ifyo bakalatweba ne fyo bakalatucinkulako, kabili mukaletontonkanya pa fyo mwingakonka no kubomfya ifyo tukasambilila.

Programu ya kulongana kwaibela ukwa bushiku bumo ikatwafwa sana ukutemwa Icebo ca kwa Lesa, ikalatucinkulako ukuba abacincila mu kubila imbila nsuma iya Bufumu no kuba abashikatala, na kabili ikatulangilila ifya kwafwa bambi pa kuti na bo bengalacita cimo cine. E ico kanshi mukashininkishe ukuti mwasangwako ku malyashi yonse pa kuti mukomfwe ukufunda konse uko Yehova akapekanya pali uku kulongana!—Esa. 30:20b, 21.