Ukuitemenwa Ukubomba Imilimo Mulafuma Ifisuma
1. Bushe Davidi na Nehemia baitemenwe shani ukubomba imilimo?
1 Ilyo Galyati aseebenye abashilika abena Israele, umushilika onse fye alikwete ishuko lya kuitemenwa ukulwa nankwe. Lelo takwali nangu umo uwaitemenwe ukulwa nankwe kano fye kacema umulumendo, uushasambilile ifya kulwa, e waile. (1 Sam. 17:32) Ilyo abaYuda bankole babwelele ku Yerusalemu no kufilwa ukukuula cipya cipya ilinga, uwalesendela imfumu ya ku Persia ulukombo e waitemenwe ukusha incito yakwe iyacindama mwi sano no kuya ku Yerusalemu ku kuteyanya umulimo wa kukuula. (Nehe. 2:5) Yehova alipaalile aba baume bonse babili, Davidi na Nehemia, pa kuitemenwa baitemenwe ukubomba imilimo.—1 Sam. 17:45, 50; Nehe. 6:15, 16.
2. Mulandu nshi Abena Kristu balingile ukuitemenwa ukubomba imilimo?
2 Muno nshiku, abantu abengi tabafwaya ukuitemenwa ukubombela bambi. Muli shino “nshiku sha kulekelesha,” abantu baba fye abapamfiwa lyonse, kabili abengi baba “abaitemwa.” (2 Tim. 3:1, 2) Calyanguka umuntu ukubika sana mano ku milimo yakwe alaba no kulabombela abantu bambi abalekabila ukwafwa. Lelo, fwe Bena Kristu, tufwaya ukupashanya Yesu, uwaleitemenwa ukwafwa bambi. (Yoh. 5:5-9; 13:12-15; 1 Pet. 2:21) Kuti twaitemenwa shani ukubomba imilimo, kabili fisuma nshi fingafumamo?
3. Bushe kuti twabombela shani bamunyinefwe ilyo tuli pa kulongana?
3 Ukubombela Bamunyinefwe: Kuti twapeela bambi “ica bupe ca bumupashi” ukupitila mu kuitemenwa ukulandapo pa kulongana ilyo kuli ukulanshanya. (Rom. 1:11) Nga tulelandapo pa kulongana ninshi tulecindika Yehova, tuleleka icine ukulimba imishila mu muntontonkanya wesu no mutima, kabili tulalenga ukulongana ukuwama nga nshi. (Amalu. 26:12) Na kabili kuti twaitemenwa ukulanda ilyashi mu kulongana kwe Sukulu lya Butumikishi Ilya Bulesa ilyo uwaciba no kulanda ilyashi teshile. Nga tulecite fi tukayatuleishiba ifya kusambilisha bwino.
4. Ni nshila nshi shimbi isho twingafwilamo bambi?
4 Bamunyina kuti balanga ukuti balafwaya ukubombela bambi nga baletinamina ukubomba imilimo ya mu cilonganino. (Esa. 32:2; 1 Tim. 3:1) Bonse kuti balenga ukulongana kukalamba no kulongana kwa citungu ukwenda bwino nga baleipeelesha ukubomba mu madipartimenti yapusanapusana. Ilyo twaitemenwa ukubomba na kangalila enda mu mulimo wa kubila nelyo ukumupekanishisha ica kulya, ici cilenga kwaba ‘ukukoseleshanya.’ (Rom. 1:12) Ilyo twayafwa abana banshiwa, bamukamfwilwa, abalwele na bakote, banyinefwe abakusha abana beka, na bambi mu cilonganino mu fyo balekabila, tulaba ne nsansa kabili Yehova alatupaala.—Amapi. 19:17; Imil. 20:35.
5. Finshi ifyakuma Ing’anda ya Bufumu ifyo twingaitemenwa ukubombako?
5 Inshila na imbi iyo twingaitemenwa ukubomfya inshita yesu na maka kwafwako ukuwamya Ing’anda ya Bufumu. Na kabili, pa mulandu wa kuti abantu abengi balesambilila icine, Amayanda ya Bufumu ayapya ayengi yalekabilwa e lyo na babomfi bakukuula na bo balefwaikwa. Abaupana babili baliipeeleshe ukubomba ne bumba lya ku mwabo ilya bakuula Amayanda ya Bufumu (Regional Building Committee) nangu ca kutila tabaishibe imilimo ya kukuula. Mu kuya kwa nshita, balibasambilishe imilimo ya kukuula kabili pali ino nshita balishiba ukukuula. Umukashi atile: “Ukubomba lyonse na bantu bambi kwalenga twakwata ifibusa ifingi. Akasuba nga kawa, tulanaka lelo ku fya kwa Lesa fyena tulapembesulwa.”
6. Mulandu nshi umulimo wa kushimikila wabela e mulimo wacindamisha uo tulingile ukuitemenwa ukubomba?
6 Ilyo Tuleshimikila: Umulimo wacindamisha uo twingaitemenwa ukubomba muno nshiku wa kubila imbila nsuma ya Bufumu. Nga twayafwa abantu ukumfwikisha amafunde yaba mu Baibolo kabili batendeka ukuyakonka, baleshiba ico twabela pano calo kabili balaba na maka ya kukaana ukucita icabipa. Balasambilila isubilo line line ilya ku ntanshi ilyaba mu Baibolo. Ilyo tulebomba ne nsansa umulimo wa kusambilisha bambi Baibolo, mulafuma ifisuma. (Yoh. 17:3; 1 Tim. 4:16) Nalimo imibele yesu kuti yatusuminisha ukubombesha muli uyu mulimo ukupitila mu kubombako bupainiya bwa kwafwilisha nelyo ubwa lyonse, ukukukila ukuli ukukabila kukalamba, nelyo ukusambilila ululimi lumbi.
7. Mulandu nshi ukuitemenwa ukubomba imilimo muno nshiku kwacindamina nga nshi?
7 Imfumu Davidi yaseseme ati pa nshita Mesia ali no kutendeka ukuteka, abantu ba kwa Lesa baali no ‘kuipeela.’ (Amalu. 110:3) Ilyo Yehova alelenga ukulobolola kwa kulekelesha ukwa ku mupashi ukwangufyanya, kuli umulimo ukalamba uo tulingile ukuitemenwa ukubomba. (Esa. 60:22) Bushe mwalilanda amuti: “Moneni, ine; ntumeni”? (Esa. 6:8) Ca cine, nga tuleitemenwa ukubomba imilimo, tulatemuna Yehova no kupaalwa nga nshi.