Sansamusheni Abapiina
1 Yesu alitemenwe abapiina. Inshita shimo alecita ifipesha mano no kubafwa mu fyo balekabila kabili aleposha abalwala, lelo umulimo alebomba sana wa kubila “imbila nsuma” ku bapiina. (Mat. 11:5) Umulimo Abena Kristu babomba muno nshiku ucili ulafwa abapiina na bantu fye bambi.—Mat. 24:14; 28:19, 20.
2 Ukwingafuma Icisansamushi ca Cine Cine: Bashimapepo ba mu macalici ya Kristendomu ilingi line balalaya abapiina ukuti nga balepeela indalama ishingi ku calici bakanonka. Lelo, Baibolo isambilisha ukuti Ubufumu bwa kwa Lesa bweka fye e bukapwisha ubupiina no kupwisha amacushi yonse. (Amalu. 9:18; 145:16; Esa. 65:21-23) Kuti twasansamusha abapiina no kubafwa ukwishiba Lesa nga tulebalanga ifyo Baibolo isambilisha.—Mat. 5:3.
3 Mu nshiku sha kwa Yesu, abaFarise balisulile abapiina. Balebeta abati “abantu ba pa nshi.” Lelo, Yesu alemona “umulopa wabo,” nelyo ubumi bwabo, ukuti ‘bwalifinisha.’ (Amalu. 72:13, 14) Kuti twapashanya Yesu no ‘kubisha’ nangu ukusenamina abapiina ba musango yu nga tulebomfwila inkumbu. (Amapi. 14:31) Tatufwile ukusuula abapiina nangu ukushimunuka ukubashimikila. Abengi abakutika imbila nsuma ya Bufumu bapiina.
4 Ifyo Twingafwa Abapiina Pali Ino Nshita: Ifishinte fyaba mu Baibolo ifyo tusambilisha abapiina ababa mu cifulo tubombela kuti fyabafwa ukucefyako ubupiina bwabo pali ino nshita. Ku ca kumwenako, Baibolo yalilesha ukukolwa, ukuteya ifyangalo fya kushitikapo indalama, ubunang’ani, ukupeepa fwaka, ne misango imbi iingalenga umo ukuba umupiina. (Amapi. 6:10, 11; 23:21; 2 Kor. 7:1; Efes. 5:5) Amalembo yatukoselesha ukuba abafumacumi no kulabomba no “mweo onse,” pantu abantu ba musango yu e bo batemwa na pa ncito. (Kol. 3:22, 23; Heb. 13:18) Na kuba, abantu bamo bafwailishe ukuti abakalamba ba twampani abengi batemwa ukwingisha incito ababa ne cishinka kabili ababombesha.
5 Yehova alasakamana abapiina. Nomba line Yesu Kristu akapokololo ‘mubusu uukuuta.’ (Amalu. 72:12) Ilyo tulelola iyo nshita, twalikwata umulimo uusuma wa kusansamusha bambi, ukubikako na bapiina kumo. Kuti twacite fyo pa kubeba isubilo ilyaba mu Cebo ca kwa Lesa.