Kampeni ya Kushimikila Iyacila Amakampeni Yonse Pano Calo!
Pa myaka ukucila pali 100, Inte sha kwa Yehova baba fye abaiteyanya bwino ukubila imbila nsuma. (1 Kor. 9:23) Pali ino nshita muli uyu mulimo wa kubila imbila nsuma uwacila amakampeni yonse pano calo, tulabila iyi mbila mu ndimi imyanda ne myanda. Tubila ku bantu baikala mu fyalo ukucila pali 230. (Mat. 24:14) Nomba bushe mulandu nshi uyu mulimo wacindamina? Kabili bushe ulebombwa shani isonde lyonse?
Vidio ya kuti Jehovah’s Witnesses—Organized to Share the Good News ilasuka ifyo fipusho pantu yena ilatulondolwela bwino imilimo yalekanalekana iyo tubomba mu fyalo ifingi. Ilyo mukalatamba iyi vidio, mukalefwaya ifyasuko kuli ifi fipusho: (1) Bushe umulimo wesu uteyanishiwa shani kabili bushe utungululwa shani? (2) Bushe amadipartimenti ya Kulemba, Ukupilibula, Ukulenga ifikope, e lyo na Dipartimenti ikopa amashiwi ne fikope, yabomba mulimo nshi mu kubila imbila nsuma? (3) Mulandu nshi kwabela amafakitale aya kupulinta no kutuma impapulo? (Yoh. 17:3) (4) Bushe ni mpapulo shinga ishipulintwa mu mwaka umo? (5) Finshi impapulo shesu ishashimpwa pali Baibolo shabomba? (Heb. 4:12) (6) Finshi ifyo ukuteyanya kulecita pa kuti kwafwilishe impofu nangu bankomamatwi ukusambilila Baibolo? (7) Bushe indalama shifuma kwi isha kubomfya ku mulimo wesu? (8) Bushe tumwenamo shani mu mulimo wa Dipartimenti Ipeela Ifyebo pa fya Fipatala (Hospital Information Services), Dipartimenti yangalila umulimo wa kushimikila, na Dipartimenti ilolekesha pa kulongana kukalamba? (9) Bushe iyi vidio yamwafwa shani imwe mwe Nte ya kwa Yehova ukwishiba bwino bwino (a) ifyo ukuteyanya kwa kwa Yehova kubombesha pa kuti fye imbila nsuma ilebilwa? (b) umulimo indupwa ukucila pali 100 isha pa Bethel mu calo conse shibomba? (c) ifyo bakangalila na bamishonari bakanshiwa? (d) ubusuma bwaba mu kubebeta ilembo lya mu Baibolo cila bushiku e lyo no kupekanya ukulongana konse cila mulungu? (e) ubusuma bwaba mu kusangwa ku kulongana kwesu ukwa Bwina Kristu? (f) ifyo Paradaise pe sonde ikaba? (Esa. 11:9) (g) ukulafwaya ukubombako umulimo ulebombwa pali ino nshita uwa kulobolola?—Yoh. 4:35.
Bushe balupwa wenu, abanenu, abasambi e lyo nabo mutwalilako impapulo shesu lelo tamulatampa ukusambilila nabo Baibolo, balandapo shani nga mwabatambisha iyi vidio?? Mulandu nshi te kuti mutambishisheko abantu na bambi iyi vidio?—Mat. 28:19, 20.