Ukulatasha Ilyo Tuleibukisha Ilambo lya Cilubula
1, 2.Mulandu nshi tufwile ukulaibukishisha ilambo lya cilubula no kutasha?
1 Pa kuti balangilile ukuti balakonka ifyo Yesu asosele, Abena Kristu icalo fye conse bakalongana pa Cibelushi pa March 22, 2008, ku kwibukisha imfwa ya kwa Yesu Kristu. (Luka 22:19; 1 Kor. 11:23-26) Tulafwaisha ukwibukisha imfwa ya kwa Yesu pa mulandu ne fintu ifisuma nga nshi ifyo ilya mfwa yalengele ukuti ficitike pali bulya bushiku, nomba napapita ne myaka 1,975. Pa mulandu wa kutwalilila ukuba ne cishinka mpaka fye na ku mfwa ya kulunguluka iya pa cimuti, Yesu acindike ishina lya kwa Wishi, ukulangilila bwino bwino ukuti amashiwi ya museebanya aya kwa Satana ya bufi.—Yobo 1:11; Amapi. 27:11.
2 Umulopa wa kwa Yesu uwasuumine e waikeshe icipangano icipya, ukulenga abantunse abashapwililika ukuba abana ba kwa Lesa pa kuti bakateke na Kristu mu Bufumu bwakwe ubwa mu muulu. (Yer. 31:31-34; Marko 14:24) E lyo kabili, ukutemwa uko Lesa atemwa abantu kwalimonekeshe ilyo apeele Umwana wakwe uo atemwa sana nge lambo, nga fintu fye Yesu umwine alondolwelele Nikodemo.—Yoh. 3:16.
3. Bushe abakasangwa ku Cibukisho bakanonkelamo shani?
3 Iteniko na Bambi: Ubutumikishi Bwesu Ubwa Bufumu ubwa January bwalimo amashiwi ayasuma aya kuti tufwile ukulemba amashina ya bantu twaishibana na bo no kuyabeta fwe bene pa kuti bakasangwe ku Cibukisho. Bushe mwalitampa ukwita abantu mwalemba amashina? Bushe mulepekanya ukubombako kampeni iikatendeka pa March 1 iya kwita abantu ku Cibukisho? Abakasangwako bakomfwa ilyashi lya Baibolo ilingabalenga ukutetekela sana ilambo lya cilubula, ne ci cikatungulula ku mweo wa muyayaya.—Rom. 10:17.
4. Mulandu nshi tufwile ukufikila bwangu ku Cibukisho?
4 Abengaipekanya ukufika bwangu bafwile ukubangilila pa kuti bakalesengela abakasumina ukwisa ku kulongana. Nangu ca kutila abasangwa ku Cibukisho balafula nga nshi, twikalaba ku bantu abatendeke nomba line ukulongana e lyo na ku bashisangwa sana ku kulongana.
5. Kuti mwateyanya shani umutima wenu ilyo mushilasangwa ku Cibukisho?
5 Teyanyeni Umutima Wenu: Mu katabo ka Ukubebeta Amalembo Cila Bushiku mu 2008 na muli 2008 Kalenda muli amalembo ayatantikwa ukutampa pa March 17 aya kubelenga pa kupekanishisha libela ukusangwa ku Cibukisho. Ukubelenga ifintu fyacindama ifyacitike mu nshiku sha kulekelesha isha kwa Yesu ilyo aali pano isonde kukamwafwa ukuteyanya umutima wenu ilyo mulesangwa ku Cibukisho. (Esra 7:10) Ukutontonkanya sana pali aya malyashi ya mu Baibolo no kulapepa kukamulenga ukutasha sana pa kutemwa kwa kwa Yehova no kwa Mwana wakwe pa kutupeela icilubula.—Amalu. 143:5.
6. Tukanonkelamo shani nga twabombesha ukulatasha nga nshi pe lambo lya cilubula?
6 Ilyo Icibukisho cilepalama, natuipekanye bwino bwino no kwafwa bambi ukuipekanya ukusangwa kuli ici cintu cishaicindamina. Ukulatasha ilyo tuleibukisha ilambo lya cilubula kukakosha bucibusa bwesu na Yehova no Mwana wakwe. (2 Kor. 5:14, 15) Na kabili ici cikalenga tukalepashanya Yehova na Yesu ilyo tuletemwa bambi icine cine.—1 Yoh. 4:11.