Umukululo wa Mepusho

◼ Bushe caliba fye bwino ifwe fwe Nte sha kwa Yehova ukundapwa ku fipatala nelyo ukusungwa mu mayanda basungilamo abakoloci ayatungululwa ne filonganino fya mapepo?

Ifilonganino ifingi ifya mapepo fyalikwata ifipatala nelyo amayanda umo basungila abakoloci no kundapa abalwele e lyo no kusunga abalwala amalwele ayashipola. Kwena ilingi line ifi fifulo tabafipangila fye ukuti filelundulula imipepele yaba muli Babiloni Mukalamba. (Ukus. 18:2, 4) Nalimo ico bafipangile kufwaya umwakusangila indalama ishakwafwilisha ico cine cilonganino ca mapepo. Pali lelo ifipatala fimo fyakwata fye ishina lya cilonganino ca mapepo, tapaba bashimapepo ababombapo, lelo fimo fyena ficili fyalikwata bashimapepo aba mpendwa fye.

Nga ca kutila umo uwa Nte sha kwa Yehova alefwaya ukuya ku cipatala nelyo alefwaya ukuya mu kusungwa ku mayanda basungilamo abakoloci, afwile ukupingulapo umwine nampo nga kuti aya nangu ca kuti fitungululwa ne filonganino fya mapepo. Umuntu umo kuti kampingu yakwe yamusuminisha ukucita ifyo, e lyo umbi na o te kuti imusuminishe. (1 Tim. 1:5) Kwaliba ifilenga ukuti umo apingulepo ukuya kuli ifi fifulo, kabili kuti cawama ukufishiba.

Ku ca kumwenako, ifipatala nelyo amayanda umo basungila abakoloci ifyakwata ne shina lya cilonganino ca mapepo nalimo e fyabako fye fyeka. E lyo limbi kuti kwaliba ifipatala nelyo amayanda umo basungila abakoloci lwa mu mupepi ifishili fya cilonganino ca mapepo lelo tabondapa bwino. Nomba ifipatala na mayanda ya kusungilamo abakoloci ifitungululwa ne filonganino fya mapepo limbi e ko bondapa bwino abalwele. Na kabili ici cine cipatala nalimo e ceka fye icakwata fimashini ifikabilwa pa kumundapa, nelyo e kusangwa fye badokota abamundapa. E lyo inshita shimo kuli ifi fine fipatala e kwaba na badokota abengasumina ukumundapa ukwabula ukumubikamo umulopa. Ifipatala fimbi ifya buteko nelyo ifyashala limbi te kuti basumine ukumundapa ukwabulo ukumubikamo umulopa. Kanshi ifi e fintu fimo ifyo mulekabila ukutontonkanyapo ilyo mulepingulapo pa cipatala mulefwaya ukuyako.

Nga mwapingulapo ukuya ku cipatala nelyo uko basungila abakoloci ifitungululwa ne filonganino fya mapepo, nalimo kuti caba fye kwati mulebalipila pa mulimo balemubombela. Nalimo kuti mwalafimona nge filonganino fya mapepo ificita fye ubukwebo, kabili umuntu nga aleyako kuli ifi fifulo pa kuti bamwafwilishe tacilepilibula ukuti aleyafwilisha imipepele ya bufi mu kulungatika. Ico mulecita kulipila fye indalama pa fyo balemwafwilisha.

Lelo kwena tufwile ukucenjela pa kuti tatulecitako ifili fyonse ku kutungilila ukupepa kwa bufi. Na kabili tatufwile ukulabomfya amalumbo babomfya pamo nga “baFather” nelyo “baSister” kuli badokota ababombela pali ifyo fipatala. (Mat. 23:9) Nga mwaya kuli ifi fipatala nelyo uko basungila abakoloci tamufwile ukucita ifintu fimbi ukucila ifyo mukonkele.

Nga bamuteka mu cipatala, bebeni ukuti muli Nte ya kwa Yehova kabili kuti mwatemwa baeluda ba mu cilonganino cenu ukulamutandalila. Nga mwacita ifi cikalenga fye ukuti baeluda bakalemusakamana ku mupashi pa nshita yonse ilyo mukaba mu cipatala.—1 Tes. 5:14.

Bamunyinefwe na bankashi abakoloci abekala mu mayanda basungilamo abakoloci ayatungululwa ne filonganino fya mapepo, bafwile ukusakamanwa muli fyonse ifikumine ukupepa Yehova kuli balupwa lwabo baNte, baeluda, na bambi mu cilonganino. Ukubikako amano ukucite fyo kukakoselesha aba bamunyinefwe na bankashi abakoloci ukukanasangwa ku mapepo ne fya kusefya e lyo ne fintu fimbi ificitika apo bekala.

Fyonse ifyo twalandapo fifwile ukulenga ifwe bonse ukumona fyonse nga fili bwino, lyena ukusalapo icipatala nelyo ing’anda uko basungila abakoloci iyo tulefwaya ukuyako.—Gal. 6:5.