Kampeni Yaibela iya Kwita Abantu ku Cibukisho!
1. Mulimo nshi bakasabankanya ba Bufumu bakalabomba isonde fye lyonse ukutampa pa March 21, 2009, kabili mulandu nshi?
1 Pali Cine, pa April 9, 2009, bakapepa ba kwa Yehova Lesa icalo fye conse apo capela bakalongana ku kutontonkanya pa nshila Lesa alangilamo ifyo atemwisha abantunse. (Rom. 5:6-8) Tule-enekela ukupokelela abalesekelela abengi nga nshi ilyo tukalaibukisha imfwa ya kwa Yesu. Kukaba ukupeela abantu isonde fye lyonse utupepala twa kubetilapo ku Cibukisho ukutampa pa March 21.
2. Fintu nshi mufwile ukulatontonkanyapo ilyo mulepeela abantu akapepala ka kubetilapo ku Cibukisho?
2 Ifya Kulatontonkanyapo: Mukabomfye bwino ifikope, amepusho, ne lembo likaba pa kapepala ka kwitilapo abantu ku Cibukisho. Ku ca kumwenako, kuti mwalanga umuntu icikope caba pa ntanshi ya kapepala no kusosa amuti: “Ndefwaya ukumwitako ukuti mukesesangwako ilyo tukalaibukisha imfwa ya kwa Yesu pali Cine, pa April 9, 2009.” Lyena landeni pa mutwe na pa mepusho ifili pa kapepala. Mwilaba ukweba mwine ng’anda ukuti nga alefwaya kuti aitako ulupwa lwakwe na bantu bambi abo engatemwa basangwako.
3. Kuti mwacita shani pa kuti muleibukishako abo mwaita kale?
3 Nga ca kuti icilonganino cenu cakwata icifulo ca kubombelamo icikulu, baeluda kuti bamweba ukusha utu tupepala na pa mayanda apashili abantu. Pa Cibelushi na pa Mulungu, mukaleshalika bamagazini pamo pene no tu tupepala. Ubuyo bwenu bufwile ukuba bwa kwita abo muya mu kumona ku fipempu, amasambililo ya Baibolo, balupwa, abo musambilila na bo, abo mubomba na bo, abena mupalamano, na bo mwaishibana fye na bo. Uyu mwaka wapwile, nkashi umo aitile balupwa lwakwe 30, e lyo mu nshita mu nshita alebebukishako pa bucindami bwa Cibukisho. Ala alyumfwile bwino ilyo abali 25 basangilweko, na pa numa bane balisumine ukusambilila Baibolo!
4. Finshi tufwile ukupekanya ili line fye, kabili mulandu nshi?
4 Pekanyeni Ili Line: Bakasabankanya abengi kuti balundako imibombele yabo mu March na mu April. Nga namukwata abana nangu amasambililo ya Baibolo abalelunduluka, nalimo iyi kuti yaba e nshita isuma iya kuti babe bakasabankanya abashabatishiwa. Ino ine nshita kuti mwatampa ukupekanya ukubombako sana muli iyi kampeni umo tukalasabankanya ukusefya kwa kwibukisha inshila shibili Yehova na Yesu batulangilamo ukutemwa.—Yoh. 3:16; 15:13.