Kampeni ya Cibukisho Ikatendeka pa 17 March
1. Ni kampeni nshi iyo tukatendeka pa 17 March?
1 Cila mwaka nga twakwata Icibukisho tubila imfwa ya kwa Yesu. (1 Kor. 11:26) E ico tulefwaya na bantu bambi bakesesangwako pa kuti nabo bakomfwe ifyo Yehova atutemwa pa kutupeela icilubula. (Yoh. 3:16) Uno mwaka kampeni ya kwita abantu ku Cibukisho ikatendeka pa Cibelushi pa 17 March. Bushe mulepanga ukubombesha muli iyi kampeni?
2. Finshi twingalanda pa kwita abantu ku Cibukisho?
2 Ifyo Twingalanda: Cilawama ukulanda fye amashiwi ayanono. Kuti twatila: “Mwapoleni mukwai. Twamuletela aka kapepala ka kumwitilapo capamo no lupwa lwenu ku Cibukisho icacindama icicitika cila mwaka mwi sonde lyonse, icikabako pa 5 April. Kukaba ilyashi lya Baibolo ilikalalanda pa fyo twanonkelamo mu mfwa ya kwa Yesu, ne fyo alecita pali ino nshita kabili takwakabe ukulipilisha. Aka kapepala kalelangilila ukukabela Icibukisho kuli ino ncende e lyo ne nshita cikabako.” Ilyo tuleshiila abantu utupepala pa mpela ya mulungu, kuti twabashilako na magazini nga nacilinga.
3. Kuti twacita shani pa kuti twite abantu abengi nga nshi ku Cibukisho?
3 Iteni Abantu Abengi: Ico tufwaisha kwita abantu abengi nga nshi. Kanshi mwikalabako ukwita abo musambilisha Baibolo, abo mucitako ifipempu, balupwa, abo mubomba nabo, abo musambilila nabo, na bambi abo mwaishiba. Baeluda bakamweba ifya kucita pa kuti mukapwishe icifulo mushimikilamo. Muli kampeni yesu iya cila mwaka iya kwita abantu ku Cibukisho mulafuma ifisuma. Ilyo umwanakashi umo aingile mu cifulo balelonganina Icibukisho umwaka wapwile, kapyunga alimwipwishe nga kuti atemwa ukumonana na kasabankanya uwamulaalike ku Cibukisho. Uyu mwanakashi atile, taishibeko uuli onse kulya kabili uwamupeele akapepala ka kumwitilapo, muntu uwaleya ku ng’anda ne ng’anda bulya bwine bushiku.
4. Mulandu nshi tulingile ukubombesesha muli kampeni iileisa?
4 Napamo umo akasangwa ku Cibukisho pa mulandu wa kapepala mwamushilile. Lelo umuntu nga asangwako nelyo akaana, ukubomba kwena ninshi namubomba. Utupepala twakwitilapo abantu tukalangilila ukuti Yesu nomba ni Mfumu iya maka. Nga mwacincila pa kubombako uyu mulimo ninshi mukalanga kuli bonse abalemimona mu cifulo mushimikila, bakasabankanya banenu, e lyo maka maka na Yehova ukuti mulatasha pa cilubula atupeela.—Kol. 3:15.