Kampeni ya Kwita Abantu ku Cibukisho Ikatendeka pa March 1
1. Ni lilali tukatampa ukwita abantu ku Cibukisho, kabili cinshi uno mwaka tukakwatila inshita ya kampeni iikalamba?
1 Pali Cisano, pa March 1, tukatampa ukwita abantu ku Cibukisho nga fintu tucita cila mwaka. Icibukisho cikabako pa 26 March, kanshi inshita ya kwita abantu ku Cibukisho ikakula ukucila iyo twalekwata imyaka yapita. Ici cikalenga tukapeele abantu abengi utupepala twa kubetilapo ku Cibukisho, maka maka balya abekala mu cifulo umo icilonganino cishimikila.
2. Bushe tukalapoka shani utupepela twa kwitilapo abantu e lyo tukabomba shani pa kuti tukashiile abantu mu cifulo cesu conse?
2 Ifyo Cikaba: Baeluda bakatweba ifya kucita pa kuti tukashimikile mu cifulo tubombelamo conse. Kabili bakalanda nga tufwile ukusha utupepela pa mayanda apo tushisangile abantu. Utupepala nga twashalapo ilyo twapwisha ukushimikila ku ng’anda ne ng’anda, kuti twapeelako na bambi abo tulekumanya. Kangalila wa mulimo akapekanya ukuti utupepela utwalembwapo inshita ne cifulo ukukabela Icibukisho tukaleba palya tupokela impapulo pa kuti bakasabankanya balebulapo. Lelo tabakabikepo tonse pa muku umo, bakulabikapo tunono tunono. Tufwile ukulasenda fye uto twingashiila abantu mu mulungu umo.
3. Cinshi tufwile ukwibukisha ilyo tuleshiila abantu utupepela twa kubetilapo ku Cibukisho?
3 Finshi Tukalalanda? Cilawama ukulanda fye ifyebo ifinono pa kuti twalanda na bantu abengi. Pe bula 4, pali ifyo twingalanda pa kushiila abantu utupepela twa kubetilapo ku Cibukisho. Kuti tulealula ifya kulanda ukulingana ne cifulo tuleshimikilamo. Na lyo line, tatufwile ukulafumapo bwangu umwine wa ng’anda nga ali na mepusho e lyo alefwaya ukuti tutwalilile ukulanshanya nankwe. Nga ni pa Cibelushi nelyo pa Mulungu apo tuleshiila abantu utu tupepela, kuti twabashiilako na magazini. Mu nshita ya kubika amano ku kutendeka amasambililo, pa Cibelushi pa 2 March tukabika amano ku kupeela abantu utupepala twa kubetilapo ku Cibukisho.
4. Mulandu nshi tufwile ukubombesha sana mu kwita abantu?
4 Tulesubila ukuti abengi bakesa ku Cibukisho. Ilyashi lya Cibukisho likaafwa abantu ukwishiba Yesu bwino sana. (1 Kor. 11:26) Likalondolola ifyo imfwa yakwe yatwafwa. (Rom. 6:23) Kabili likalanda na pa fyo cacindamina ukumwibukisha. (Yoh. 17:3) Shi natukabombeshe ukwita abantu!