Kampeni Iyaibela

1. Ni lilali tukatendeka kampeni ya kwita abantu ku kulongana kwa citungu ukwa mu 2014?

¹ Nga namubombesha sana ukupekanishisha ifibusa nelyo balupwa wenu ifya kulya ifisuma kabili ifya mutengo, pa kubeta kulaba ukusansamuka nga nshi. Bamunyinefwe nabo balibombesha nga nshi ukupekanya umutebeto wa ku mupashi uo tukakwata pa kulongana kwa citungu no kulongana kwa bakafuma mu fyalo fyalekanalekana ukukabako uno wine umwaka. Pa milungu itatu ilyo ukulongana kushilatendeka, tukakwata ishuko lya kwita abantu ukwisasangwako. Cinshi cikatwafwa ukuba abacincimuka pa kwita abantu?

2. Cinshi cikatwafwa ukubombesha ilyo kukaba kampeni?

² Nga tuletontonkanya sana pa fyo tunonkelamo ilyo twasangwa ku mutebeto uo Yehova atupekanishisha pa kulongana kwa citungu, tukafwaya ukubombesha sana muli iyi kampeni. (Esa. 65:13, 14) Tufwile ukulaibukisha ukuti abantu abengi balasangwa ku kulongana pa mulandu wa kampeni tukwata cila mwaka. Kwena, bamo abo tuketa ku kulongana bakesa. Nomba, nampo nga abakesa bengi nelyo banono, ukubombesha kwesu muli iyi kampeni kukalenga Yehova akacindikwe kabili abantu bakamona ukuti ni kapekape.—Amalu. 145:3, 7; Ukus. 22:17.

3. Tukabomba shani kampeni ya kushiila abantu utupepala twa kubetilapo ku kulongana kwa citungu?

³ Amabumba ya baeluda yonse balingile ukumona ifyo icilonganino cikabomba umulimo wa kushiila abantu utupepela twa kubetilapo ku kulongana kwa citungu. Bafwile no kweba icilonganino nampo nga balingile ukusha utupepala pa mayanda apashili abantu e lyo ne fya kucita lintu baleshimikila ku cintubwingi mu cifulo bashimikila. Pa mpela ya mulungu, kuti mwamona nga nacilinga ukushiila abantu magazini pamo no tupepala twa kubetilapo ku kulongana kwa citungu. Nga ca kuti Icibelushi ca kubalilapo mu mweshi caba muli ilya ine nshita ya kampeni, ninshi mufwile ukubika sana amano ku kushiila abantu utupepala ukucila ukutendeka amasambililo ya Baibolo. Ilyo kampeni ikapwa, tukaba sana ne nsansa nga twatontonkanya pa fyo twabombeshe ukwita abantu ukwisa ku mutebeto wa ku mupashi uo Yehova atupekanishishe!