Kampeni ya Kwita Abantu ku Kulongana kwa Citungu

Cila mwaka, tulatemwa sana nga twaumfwa ukuti tuli no kukwata umutebeto wa ku mupashi, e kutila ukulongana kwa citungu. Pa kuti abantu bakasondeko ubusuma bwa kwa Yehova, tufwile tukabombeshe pa kuti tukete abengi nga nshi ukwisasangwako. (Amalu. 34:8) Ibumba lya baeluda lifwile ukupekanya bwino ifyo icilonganino cikabomba pa kuti bakapeele abantu utupepala utwingi utwakubetilapo ku kulongana kwa citungu.

IFYO TULINGILE UKULAIBUKISHA

• Ni lilali nkalongana icitungu?

• Ni lilali kampeni ya kwita abantu ikatendeka mu cilonganino cesu?

• Ni lilali tukumana ukuya mu kubila imbila nsuma mu cilonganino cesu?

• Bushe imfwile ukubomba shani ilyo kukaba kampeni?

• Ni bani mfwile ukwita ku kulongana kwa citungu?

IFYO MWINGALANDA PA KWITA ABANTU

Pa numa ya kuposha umuntu, nalimo kuti mwasosa amuti:

“Tuli muli kampeni ya kwita abantu ku kulongana kwacindama sana uko tukakwata. Inshiku, inshita ne cifulo ukukabela uku kulongana nafilembwa pali aka kapepala. Kuti twatemwa nga ca kuti mwaisasangwako kuli uku kulongana.”

KUTI MWACITA SHANI UMUNTU NGA ALEFWAYA UKWISHIBILAPO NA FIMBI?

Nangu ca kuti tulefwaisha ukwita abantu abengi sana ku kulongana kwa citungu, tufwile no kubika sana amano kuli balya abengafwaya ukwishibilapo na fimbi.

Pa Cibelushi nelyo pa Mulungu, kuti mwapeela abantu akapepala ka kubetilapo e lyo na magazini.