Kampeni Iilenga Abantu Ukusangwa ku Kulongana

Na uno mwaka, cila cilonganino cikatendeka kampeni ya kwita abantu ukuyasangwa ku kulongana kwa citungu nga kwashala imilungu itatu ukuya ku kulongana. Iyi kampeni iibako cila mwaka yalicindama sana. Abesa ku kulongana nga twabeta, balatemwa sana ukumfwa amalyashi ayafuma mu Baibolo ayalandwa, e lyo balapapa ukumona ifyo abantu abaitemenwa ukubomba imilimo mu madipartimenti babomba bwino kabili balatemwa ukumona imibele yesu isuma e lyo ne fyo twaikatana. (Amalu. 110:3; 133:1; Esa. 65:13, 14) Bushe abo tulaalika ilyo kuli kampeni balakumanisha ukusangwa ku kulongana? Inga balya aba kuti pa kusangwako bafwile ukwenda ubulendo ubutali, bushe balasangwako?

Pa numa ya kulongana kwa citungu ukwa mu 2011, aba pa maofeshi ya Nte sha kwa Yehova bapokelele kalata ukufuma kuli namayo uwasangile akapepala ka kumwita ku kulongana na bakafyantika mu ciibi. Ilingi line uyu namayo alebelama nga ba Nte baisa pa mwakwe. Alembele ati: “Nalikwete ing’anda iisuma no mwina mwandi uwantemwa, e co nalemona kwati nalikwete fyonse fye ifyo nalekabila. Na lyo line, nshakwete insansa sha cine cine. E ico, napingwilepo ukuyasangwa ku kulongana pa Cibelushi kabili naendele na motoka ubulendo bwa makilomita 320.” Uyu namayo ali-ipakishe sana ukulongana ica kuti atumine umwina mwakwe foni no kumweba ukuti tabwele ku ng’anda pantu alefwaya ukulonganako na pa Mulungu. Atile: “Nalikutike ku malyashi yonse, e lyo nalimonene na ba Nte abengi, kabili napingwilepo ukuti nomba nakulasangwa na ba Nte.” Ilyo abwelele ku ng’anda, atendeke ukusambilila Baibolo kabili pa numa ya myeshi 4 aisheleba kasabankanya uushabatishiwa. Uyu nkashi yesu atile, “Ndatasha sana ukuti nalisangile akapepala ka kunjita ku kulongana mu ciibi, nomba naliba ne nsansa sha cine cine!”

Bamo abo tukapeela utupepala bakesa ku kulongana. Kanshi mukabombeshe iyi kampeni iyacindama nga nshi. Utupepala twa kampeni nga twashalako, mulingile ukuya nato ku ncende mukalalonganina pa kuti mukatubomfye ukushimikila ku bantu ilyo muleisha.

[Akabokoshi pe bula 1]

Tukalashalika Shani Utupepala?

Pa kuti tukashimikile mu cifulo cesu conse, tufwile ukulanda ifyebo ifinono fye. Napamo kuti twatila: “Muli shani? Tulepeela abantu utu tupepala utulepeelwa ku bantu mu calo fye conse. Na imwe kuti mwasendako kamo. Ifingi mwalaibelengela muli aka kapepala.” Ilyo mulepeela abantu utupepala, mulecincimuka pa kulanda. Nga muleshalika utupepala pa mpela ya mulungu, kuti mwashalika na magazini nga calinga.