Ubwite bwa mu Kulungatika

1. Ni lilali tukatendeka kampeni ya kwita abantu ku kulongana kwa citungu?

¹ Nga namubombesha sana ukupekanishisha ifibusa nelyo balupwa wenu ifya kulya ifisuma kabili ifya mutengo, pa kubeta kulaba ukusansamuka nga nshi. Bamunyinefwe nabo balibombesha nga nshi ukupekanya umutebeto wa ku mupashi uo tukakwata pa kulongana kwa citungu. Pa milungu itatu ilyo ukulongana kushilatendeka, Yehova natupeela ishuko lya kwita abantu ukwisasangwako. Cinshi cikatwafwa ukuba abacincimuka pa kwita abantu?

2. Cinshi cikatwafwa ukubombesha ilyo kukaba kampeni?

² Nga tuletontonkanya sana pa fyo tunonkelamo ilyo twasangwa ku mutebeto uo Yehova atupekanishisha pa kulongana kwa citungu, tukafwaya ukubombesha sana muli iyi kampeni. (Esa. 65:13,14) Tufwile ukulaibukisha ukuti abantu abengi balasangwa ku kulongana pa mulandu wa kampeni tukwata cila mwaka. (Moneni akabokoshi akaleti “Mulafuma Ifisuma.”) Kwena, bamo abo tuketa ku kulongana bakesa. Nomba, nampo nga abakesa bengi nelyo banono, ukubombesha kwesu muli iyi kampeni kukalenga Yehova akacindikwe kabili abantu bakamona ukuti ni kapekape.—Amalu. 145:3, 7; Ukus. 22:17.

3. Tukabomba shani kampeni ya kushiila abantu utupepala twa kubetilapo ku kulongana kwa citungu?

³ Amabumba ya baeluda balingile ukumona ifyo icilonganino cikabomba umulimo wa kushiila abantu utupepela twa kubetilapo ku kulongana kwa citungu. Bafwile no kweba icilonganino nampo nga balingile ukusha utupepala pa mayanda apashili abantu e lyo ne fya kucita lintu baleshimikila ku cintubwingi mu cifulo bashimikila. Pa mpela ya mulungu, kuti mwamona nga nacilinga ukushiila abantu magazini pamo no tupepala twa kubetilapo ku kulongana kwa citungu. Ilyo kampeni ikapwa, tukaba sana ne nsansa nga twatontonkanya pa fyo twabombeshe ukwita abantu e lyo ne fyo abantu abengi baishilesangwa kuli uyu mutebeto wa ku mupashi uo Yehova atupekanishishe!

Mulafuma Ifisuma

Kale, nkashi umo alemona kwati tamufuma ifisuma nangu fimo muli kampeni ya kwita abantu ku kulongana. Aleipusha ukuti, ‘Bushe abantu kuti basumina ukwisalongana na ifwe?’ Pa Cibelushi ulucelo pa bushiku bwa kulongana kwa citungu, amwene umwaume umuSiki naikala lwa mupepi, e ico alile apo ali no kuilondolola. Ilyo alandile nankwe asangile ukuti uyu mwaume aishile ku kulongana pa mulandu wa kuti alipokeleko akapepala twitilapo abantu. Uyu mwaume alipwishe amepusho ayengi kabili nkashi alimwaswike. Alandile ukuti alitemenwe sana amalyashi ayalelandwa, imifwalile ne mibele yabasangilwe ku kulongana. Ubushiku bumo bwine, uyu nkashi atendeke ukulanshanya na baupana babili abaikele mupepi. Nabo bene balipokeleko akapepala kabili baishile ku kulongana na basi. Balitemenwe sana amalyashi yalelandwa kabili batile balefwaya ukusangwako na pa bushiku bwa pa Mulungu. E lyo nkashi amwene ukuti kampeni ya kwita abantu ku kulongana yalicindama sana.
Pa kulongana kwaliko nomba line bapainiya babili abaupana bailondolwele ku baupana babili abakalamba. Aba abakalamba batile e muku wa kubalilapo basangilweko ku kulongana. Bapainiya babepwishe ukuti, “Bushe ni bani bamwitile?” Bayaswike abati, “ Bushiku bumo ilyo twabweleele pa ng’anda twasangile akapepala mwi samba lya ciibi.” Balikabelengele kabili balilembele amashina yabo, na adresi ya ng’anda ku numa ya aka kapepala. Bambi abali pa kulongana balipeeleko aba abakalamba ica kulya ca kasuba. Baliipakishe ukulongana ica kuti batile balefwaya ukusangwako na pa bushiku bwakonkelepo. Balipekenye ukuyabatandalila pa kuti bakatendeke ukusambilila nabo Baibolo.