Ukusabankanya mu Calo Conse Ukulongana kwa Citungu Ukuleti “Konkeni Kristu!”
Na Kabili Tukalasabankanya Akapepala Kakwitilapo Abantu ku Kulongana kwa Citungu
1 Umwaka wapwile, kampeni ya kusabankanya ukulongana kwa citungu ukwaleti “Ukulubuka Nakupalama!” yalengele abapya ukufwaya ukusambilila na fimbi pali Baibolo. Abasumine ubu bwite bwaibela baliimwenene abene pa muku wa kubalilapo ifyo umutebeto uusuma uwa ku mupashi uwa Nte sha kwa Yehova uba. (Esa. 65: 13) Balimwene ifyo ifwe twaikatana kabili baliipakishe ukwampana na ifwe. (Amalu.133:1) Pa kuti tukafwe abengi ukusangwa ku Kulongana kwa Citungu ukuletila “Konkeni Kristu!,” na uno mwaka tukasabankanya mu calo conse akapepala ka kwitilapo abantu kuli uku kulongana.
2 Ifyafumine Muli Kampeni wa Mwaka Wapwile: Ukulingana na malipoti twapokelele ukufuma mwi sonde lyonse, abantu balitemenwe ukumfwa ukusabankanya kwa Kulongana kwa Citungu ukwaleti: “Ukulubuka Nakupalama!” Mu fifulo ifingi abantu abengi balilandilepo. Ku ca kumwenako, mu nyunshipepala imo mwali ilyashi ilyalelanda pali kampeni ilyakwete imikululo 6, yatile: “Pa kulanda na bantu abengi ilyo ukulongana kwali kushilatendeka baNte balibikileko sana amano ukupoosa inshita iikalamba pa kuti fye balande na bantu abengi mu cifulo baleshimikila. Cimbi na co ca kuti baNte baleenda sana kabili tabalekokola pa kulanda na bantu.” Ukubombela pamo mu kusabankanya aka kapepala kwalengele abalemba amanyunshipepala mu musumba umo, ukulemba ifyebo fisuma pa lwa aka kene kapepala. Amanyunshipepala yatatu e yalandilepo ifisuma pali uyu mulimo wesu uo twabombele ilyo ukulongana takulafika. Umo uulemba amalyashi mu nyunshipepala alembele ukucila pa mabula yabili ifyebo pali kampeni ya baNte mu nyunshipepala ya pa Mulungu. Alembele pa fyo twasuminamo, ifyo twatemwana, ukusabankanya kwa aka kapepala, e lyo na pa kulongana kwa citungu kwine. Ilyo kasabankanya umo apeele umuntu umo akapepala ka kumwitilapo, uyo umwine wa ng’anda acilime kasabankanya no kutila, “Aka kapepala mulempeela, e ko nacilabelengapo mu nyunshipepala!” Umuntu umo na o uo baNte basangile pa ng’anda atile: “Nomba line fye nacilabelenga pali imwe baNte mu nyunshipepala. Tapalapita ne nshita mwaisa! Bushe ninshi nine mwaletela aka kapepala?” Lyena atile: “Mulimo uusuma uo Inte sha kwa Yehova shilebomba.”
3 Abantu abengi balishile ku kulongana kwa citungu ninshi nabakwata no tupepala babetilepo mu minwe yabo. Bamo pali aba baendele na bamotoka babo imilundu iingi ukufuma ku misumba bekala ku kusangwa ku kulongana inshiku shonse. Ukubombesha twabombeshe ukwita abantu e kwalengele ukuti impendwa ya basangilweko ifule nga nshi, ica kuti icalo cimo impendwa ya basangwilweko yafikile ku mapesenti 27 ukucila umwaka wapwile.
4 Ukupwisha Icifulo ca Kubombelamo: Kuti mwatendeka ukusabankanya aka kapepala ilyo kwashala imilungu itatu ilyo tamulaya ku kulongana. Mufwile ukubombesha pa kuti mupwishe ukubombela mu cifulo conse ico icilonganino cishimikilamo. Mu filonganino umwaba ififulo fya kubombelamo ifikalamba, limbi ifyo bakasabankanya bengacita nga basanga pa ng’anda tapali abantu kusha fye aka kapepala mu nshi ya ciibi cikulu fye takalemoneka ku bapita nshila. Kuti batendeka ukucita ifi mu mulungu wa kulekelesha ilyo tabalaya ku kulongana. Ifilonganino fifwile ukupwisha ukusabankanya utupepala tonse kabili fifwile no kubombesha pa kuti fipwishe ukubombela mu cifulo bafipeela. Nga ca kutila utupepala twa kwitilapo abantu twashalapo, kuti bapeela bapainiya.
5 Ifya Kulanda: Nalimo kuti mwatila: “Icalo fye conse ifwe fwe Nte sha kwa Yehova tulesabankanya aka kapepala kakwitilapo abantu ku kulongana kukalamba ukuleisa. Aka kapepala kenu. Mulesangamo ifyebo na fimbi ifilelanda pali ubu bwite.” Nga tatulefusha ifya kulanda kuti twashila abantu abengi akapepala. Lelo, nga ca kutila uo mwasanga pa ng’anda aipusha ifipusho, mwasukeni. Nga atemwa ifyo mwalanshanya nankwe, lembeni ishina na adresi yakwe pa kutila mukabweleleko bwangu bwangu.
6 Kanshi calicindama ukuti tulekonka Kristu! (Yoh. 3:36) Ukulongana kwa citungu ukuleisa kukatwafwa ifwe bonse ifya kucita pa kukonka Kristu. Na uno wine mwaka tuleenekela ukutila tukapeela ubunte ubukalamba pa mulandu wa kubombesha ukusabankanya ukulongana kwa Citungu ukuleti: “Konkeni Kristu!” E ico kanshi mukabombeshe ukwita abantu abengi pa kutila bakesesangwako. Tulelomba ukuti Yehova akamupaale ilyo mukalabombesha muli uyu mulimo uo bamunyina na bankashi mu calo conse nabo bakalabomba.