Lulu we Sonde Lyonse uwa Kusabankanya Ukulongana kwa Citungu Ukuleti “Ukulubuka Nakupalama!”
Bakasabankanya Muli Cila Cilonganino Bali no Kwananya Handibilu Waibela
1 Ukutendeka mu May 2006 ku fyalo fyabela ku kapinda ka ku kulyo (Northern Hemisphere) ukwisashinta ilyo ukulongana kwa citungu konse kukapwa isonde lyonse, kukaba lulu wa kusabankanya ukulongana kwa citungu ukukaba mu fyalo 155. Ubufwayo bwa uyu lulu bwa kulenga abantu ukufwaisha ukusangwa ku kulongana kwa citungu no kubakoselesha. Uyu lulu akaba na mu fyalo umukaba ukulongana kwa citungu ukwaibela mu Germany, mu Czech Republic, na mu Poland. Uku kulongana kukaba mu mweshi wa July na mu mulungu wa ntanshi mu August 2006.
2 Apo tuleikala ku mpela ya nshiku sha kulekelesha, ukulongana kwa citungu ukulelanda pa fyo Lesa atulaya ukuti akatulubula ku bwikashi bwabipa, kufwile ukulenga abantu abafwaya umweo ukufwaisha ukusangwako. Ubu bukombe bufwile bwabalenga ukutontonkanya pa fili no kucitika ku ntanshi. Pa kuti tupeele abantu iminshipendwa ishuko lya kumfwa ubukombe bwa nsansa kabili ubwe subilo, ifilonganino ukucila pali 98,000 ifya Nte sha kwa Yehova filekoseleshiwa ukubombako umulimo wa kusabankanya ukulongana uko bakasangwa.
3 Amahandibilu ayengi yakatumwa ku filonganino pa kuti cila kasabankanya akakwate amahandibilu 15. Ayakashalako yakapeelwa kuli bapainiya mu cilonganino. Mu cilonganino cimo na cimo, lulu akalatendeka nga kwashala imilungu itatu ukuya ku kulongana kwa citungu uko icilonganino cikayalongana. Nga twatendeka ukwananya pali iyi nshita kuti twakwata inshita ikalamba iya kushalika amahandibilu ku bantu abengi, nelyo fye bonse, ababa mu cifulo tubombela.
4 Tulekoseleshiwa ukuti cila kasabankanya akalepeela umwine wa ng’anda handibilu mu minwe. Lelo, nga ca kutila pa ng’anda tapali bantu, kuti mwasha handibilu apengalinga ukuisha. Bakasabankanya bafwile no kupeelako abasambi babo aba Baibolo na balupwa lwa bo basambilila na bo Baibolo, e lyo na basekelela mu cifulo ca kubombelamo, pa kuti bakasangweko ku kulongana kwa citungu. Mufwile ukubombesha ukwananya amahandibilu yonse mu milungu itatu.
5 Lipoti ya Mulimo iya March iyili muli buno Ubutumikishi Bwesu Ubwa Bufumu ifwile ukutucincisha muli uyu lulu tukwete. Tuli ne nsansa pali lipoti ya fipendo fipya ifyo twafikilepo. Icipendo cipya ica bapainiya ba nshita yonse ni 10,168 icalengele no kuti kube icipendo cipya ica bakasabankanya ica 129,806. Kabili ifipendo fimbi ifipya ifya mpapulo twashalike, ifitabo ifyali 37,454 e lyo na bamagazini bali 667,593. Kabili muli lipoti muli ne mpendwa ipya iya masambililo ya Baibolo ayatungulwilwe ayali 209,034.
6 Bushe muleibukisha ifyo icilonganino cacincimwike mu March ilyo kwali ukwingilishako ukushimikila? Bushe kuti twafika pali ifi fipendo na kabili ilyo tulebomba iyi lulu iya calo conse? Bakangalila ba masambililo ya fitabo na bakaafwa babo bafwile ukumona ifyo bengakoselesha ibumba lyabo ukwingilishako imibombele. Bakalemba na bo bafwile ukulemba lipoti ya cilonganino iya mulimo wa mwi bala iyalungama no kuituma bwangu bwangu ku ofesi lya musambo. Kasabankanya uushatumine lipoti uyu mweshi wapwile apendwa nga bakasabankanya babili mu mweshi ukonkelepo nga atuma lipoti.
7 Tulesubila ukuti ubunte ubukalamba bukashimikwa pa mulandu wa mulimo uukabombwa isonde lyonse uwa kusabankanya Ukulongana kwa Citungu ukuleti “Ukulubuka Nakupalama!” Tulepepa ukuti ipaalo lya kwa Yehova likabe pa kubombesha kwenu ilyo mukalabombako uyu lulu we sonde lyonse.