Kampeni ya Kwita Abantu ku Cibukisho Ikatendeka pa 22 March

Uno mwaka tukatendeka kampeni ya kwita abantu ku Cibukisho pa Cibelushi pa 22 March. Tulekoselesha bonse ukuti bakabombeko iyi kampeni. Ilyo tukalapeela abantu utupeela twa kubetilapo ku Cibukisho pa Cibelushi, tukalebapeela na magazini iipya nga calinga ukubapeela. Pa Cibelushi ca kubalilapo mu April, tukabika sana amano ku kwita abantu ku Cibukisho mu nshita ya kubika amano ku kutendeka amasambililo ya Baibolo. Lelo nga umuntu alefwaisha ukumfwa ifyo tulelanda, kuti twatendeka isambililo lya Baibolo. Kangalila wa mulimo akamona nga nacilinga ukubombako no bunte bwa ku cintubwingi pa kuti kwingaba ukupeela abantu abengi aba mu cifulo mushimikila utupepala twa kubetilapo ku Cibukisho. Mulembele libela amashina ya bantu mulefwaya ukwita ku Cibukisho pa kuti cikamwangukile ukubatwalila utupepala twa kubetilapo ku Cibukisho. Kuti mwalemba amashina ya balupwa wenu, abo mubomba nabo, abo musambilila nabo ku sukulu, ifipempu e lyo na bantu bambi abo mulefwaya ukwita ku Cibukisho. Tulesubila ukuti abengi bakesa ku Cibukisho pa kuti tukabe nabo ilyo tukalaibukisha ukutemwa Lesa atulangile pa kutuma umwana wakwe ukwisa tufwila e lyo ne fyo Yesu alangile ukutemwa pa kusumina ukwisa pe sonde no kwisa tufwila.—Yoh. 3:16; 15:13.