Magazini Yesu—Yalitemwikwa ku Bengi
1. Bushe umusha wa cishinka kabili uwashilimuka apashanya shani umutumwa Paulo?
1 Filya fine umutumwa Paulo alealula inshila aleshimikililamo imbila nsuma pa kuti anonke “abantu bonse,” e fyo no musha wa cishinka kabili uwashilimuka abomfya magazini yesu pa kusambilisha abantu aba nkulilo shapusanapusana ne fisumino. (1 Kor. 9:22, 23) Pa kuti tulebomfya bwino Ulupungu lwa kwa Kalinda na Loleni! tufwile ukulaibukisha abo balembela iyi magazini yonse ibili.
2. Bushe ni bani maka maka balembela Loleni!
2 Loleni!: Ico balembela iyi magazini kufwaya ukwafwa abantu ababa nga balya Paulo alandilepo ilyo aleshimikila “abena Atena.” (Imil. 17:22) Balya bantu tabali Bena Kristu, kabili tabaishibe bwino bwino Amalembo. E fyo na magazini ya Loleni! yaba, balembela balya aba kuti tabaishiba sana Baibolo nelyo aba kuti tabaishibapo fye nangu kamo pali Baibolo. Kabili balembela balya abashaishibapo nangu fimo pa fyo Abena Kristu basambilisha, tabacetekela imipepele iili yonse, nelyo tabaishiba ukuti muli Baibolo mwaliba ifyebo ifingabafwa mu mikalile yabo. Umulandu uukalamba Loleni! ilembelwa wa kulenga ababelenga ukushininkisha ukuti Lesa wa cine eko aba. Na kabili iyi magazini ilafwa abantu ukucetekela Baibolo kabili ilafwa ababelenga ukwishiba ukuti Inte sha kwa Yehova balipusana na mabumba ya mipepele yambi.
3. Ni bani maka maka balembela magazini ya Ulupungu lwa kwa Kalinda iya bantu bonse ne ya kusambililamo?
3 Ulupungu lwa kwa Kalinda: Abo balembela iyi magazini ya bantu bonse ni balya aba kuti balicindika Lesa na Malembo. Balishibako fimo pali Baibolo lelo tabaishiba bwino bwino ifyo isambilisha. Baba nga balya bantu abo Paulo alandilepo ilyo atile ‘baletiina Lesa.’ (Imil. 13:14-16) Ulupungu lwa kwa Kalinda ulwa kusambililamo lwena balembela maka maka Inte sha kwa Yehova. Paulo aishibe ukuti abalebelenga amakalata yakwe balishibe Amalembo kabili balishibe bwino bwino icine. (1 Kor. 1:1, 2) Cimo cine ne fipande fiba muli magazini ya kusambililamo, abo balembela ni balya abasangwa ku kulongana kabili balishiba amashiwi baNte babomfya e lyo ne fishinte bakonka.
4. Mulandu nshi tufwile ukwishibila libela ifili muli magazini imo na imo iyo tulebomfya mwi bala?
4 Nangu ca kutila ilingi line tushalika Ulupungu lwa kwa Kalinda pamo na Loleni!, ilingi tulanda fye pali magazini imo. Kanshi, lyonse mulepitulukamo calimo pa kuti mwaishiba ifyo magazini ilelandapo. Nga mwalacita ifyo cikamwafwa ukushalika magazini iilelanda pa fyo abantu mwakumanya bengatemwa ukumfwa.