Tufwile Ukulapempula Abantu Nga Twabashimikila
1. Finshi tufwile ukucita pa kwafwa umuntu ukulunduluka?
1 Nga twabyala imbuto mwi bala, tufwile ukulashitapilila pa kuti shimene. E fyo caba na ku mbuto sha cebo ca kwa Lesa isho tubyala mu mitima ya bantu tushimikila uko twikala. (1 Kor. 3:6) Nga tulefwaya imbuto sha mampalanya shikwate imishila, shikule, no kutwala ifisabo, tufwile ukulashitapilila ukubomfya Icebo ca kwa Lesa, e kutila ukulabwelelako kubo twashimikile.
2. Kuti mwalenga shani abo mwashimikila ukufwaisha ukuti mukabweleleko?
2 Ipusheni Icipusho: Nga mwapekanya ifyebo fya kushimikila umuntu, kuti mwapekanishisha calimo ne cipusho ico uo mulelanshanya nankwe engatemwa, pa kuti mukeseasuka ilyo mwabwelelako. Ipusheni ico cipusho pa mpela ya kulanshanya kwa kubalilapo, kabili panganeni ilyo mukabwelelako. Abengi basanga ati cilaba bwino nga basala ilyashi limo mu citabo ca Ico Baibolo Isambilisha pantu e co bakabomfya ku kulangilila uyo muntu ifyo tusambilila Baibolo.
3. Finshi mwingalemba umuku wa kubalilapo mwalanshanya no muntu uutemenwe icine?
3 Mulelemba: Nga mwapwisha fye ukulanshanya no muntu umuku wa kubalilapo, lembeni ifyo mwalanshanyapo. Lembeni ne shina lya uyo muntu noko mwingamusanga. Cilawama no kulemba ubushiku ne nshita mwalanda nankwe, ifyo mwacilanshanyapo, e lyo no lupapulo, nga mwacimushiila ululi lonse. Bushe acilanda uko apepa? Bushe alikwata ulupwa? Bushe acilanda ifyo atemwa nelyo ifimusakamika? Ukwishiba ifi fintu kukamwafwa ukulanda pa malyashi ayacindama kuli ena ilyo mwabwelelako. Kabili lembeni ubushiku nelyo inshita mwapangana ukuti e lyo mukabwelelako ne casuko mukaya-asuka.
4. Mulandu nshi tulingile ukukwatila umute wa kubwelela ku batemwa imbila tubila?
4 Muleba no Mute: Satana akatwalilila fye ukulaesha ‘ukusenda icebo’ icalimbwa mu mitima ya bantu. (Marko 4:14, 15) E ico mwilafuupuka nga tamulesanga abalefwaya ukusambilila icine pa mayanda ilyo mwabwelelako. Bushe te kuti mubalembele kalata nelyo ukusha akapepala mwi samba lya cibi? Painiya umo atendeke isambililo lya Baibolo pa mwinshi no mwanakashi umo lelo tatalilemusanga pa ng’anda na kabili, e ico alimulembele kalata. Ilyo uyu nkashi asukile amusanga pa ng’anda, umwanakashi alandile ukuti filya nkashi alangile ukuti alimupooseleko amano, fyalimufikile sana pa mutima. Ilyo tuletapilila imbuto sha cebo ca kwa Lesa, kuti twaba ne nsansa nga twamona uko shilemena, shakula, shakosa, e lyo ‘shatwala ifisabo amakumi yatatu (30), na makumi mutanda (60), no mwanda umo (100).’—Marko 4:20.