Ni Lilali Twingabwelela ku Balefwaya Ukusambilila Baibolo?
1. Cinshi ico tufwile ukucita ilyo tulebomba umulimo wa kupanga abasambi?
1 Mu mulimo wa kupanga abasambi mwaba no kubwelela kuli bonse abalefwaya ukusambilila pa Bufumu bwa kwa Yehova. (Mat. 28:19, 20) Inshita isuma iya kubwelelako ilingi lingi ishintilila pa nshita imwe mukwete e lyo ne nshita uyo muntu akwete. Mulandu nshi tushifwile ukupoosela inshita ukubwelela ku muntu uulefwaya ukusambilila Baibolo?
2, 3. Mulandu nshi tufwile ukubwelelako bwangu ku balefwaya ukusambilila Baibolo?
2 Mulandu Nshi Tushifwile Ukupoosela Inshita Ukubwelelako? Umulimo wa kushimikila “imbila nsuma iyi iya bufumu” uli mupepi no kupwa kabili impela ya buno bwikashi na yo naipalama. (Mat. 24:14; 1 Pet. 4:7) Kanshi ilyo kucili “ubushiku bwe pusukilo” ku balefwaya ukusambilila Baibolo, tufwile ukumfwila amashiwi ya kuti ‘bila icebo no kucincila.’ Ilyo tulecite fi tufwile no kubwelelako bwangu bwangu pa kutila abalefwaya ukusambilila Baibolo batwalilile ukutemwa icine.—2 Kor. 6:1, 2; 2 Tim. 4:2.
3 Satana alefwaya sana ukonaula imbuto sha Bufumu isho tulebyala mu mitima ya balefwaya ukusambilila Baibolo. (Marko 4:14, 15) Ilingi line abapumya abalefwaya ukusambilila ni balupwa, abo babomba na bo e lyo na bantu bambi. Ukubwelelako bwangu kulalenga twatwalilila ukulanshanya nabo ukutampila apo twashiliile ilyo bambi bashilabafuupula.
4. Finshi twingacita pa bushiku bwa kubalilapo pa kutila cikanguke ukucita icipempu ca kubwelelamo?
4 Panganeni: Cilawama bulya bwine ubushiku bwa kubalilapo mwalanshanya no muntu ukupangana ilyo mukabwelelako. Bepusheni icipusho ico mukasuka ilyo mukabwelelako. Cikankaala nga nshi ukusunga bwino apo mulembele ubushiku mwalanshanya no muntu e lyo no bushiku mukabwelelako. Nga namukwata inshita kuti cawama ukwipusha abo mwalanshanya na bo nga kuti mwabwelelako ubushiku ubukonkelepo nelyo ilyo pashilapita sana inshita. Nga ca kuti ubushiku bwa kubalilapo mwalanshanya ni pa Cibelushi nangu pa Mulungu kabili uyo muntu alabomba mu kati ka mulungu, nalimo kuti asumina ukumutandalila pa Cibelushi nelyo pa Mulungu umulungu ukonkelepo. Nga mwapangana ubushiku bwa kubwelelako, shininkisheni ukuti mwafikilisha.—Mat. 5:37.
5. Bushe ukubwelelako bwangu ku balefwaya ukusambilila Baibolo kuti kwatwafwa shani ukufikilisha umulimo Yesu atupeela uwa kupanga abasambi?
5 Ala fingi filenga ukuti tubweleleko bwangu bwangu ku balefwaya ukusambilila. E mulandu wine mufwile ukupanganina ilyo mwingabwelelako ilyo pashilapita sana inshita, pantu “inshita iisheleko naicepa.” (1 Kor. 7:29) Nga twabwelelako bwangu ku balefwaya ukumfwa ubukombe bwa Bufumu, kuti mwafuma ifisuma mu kubombesha kwesu.