Ukubwelelako ku Kukuula Ukutesekesha
1 Ifipempu fya kubwelelamo ifyabamo bupilibulo filabimbula no kulumya ukukula kwa kwa mwine ŋanda ukulola ku kuba uwasumina mu kulundulukilako. Mitubululo nshi imo iibomba iya kusunga mu muntontonkanya lintu tulebwelela kuli abo abalangisha ubuseko?
2 Ica kubalilapo, pekanyeni bwino. Ici citendekela pa kutandala kwa kubalilapo. Shani fyo? Pa kusunga ifyalembwa fyalungikwa ifya buseko bwalangwa. Lembeni ishina lya kwa mwine ŋanda, umutwe wa lyashi uulanshanishiwepo, ukwankulako, ne fishalikwe ifili fyonse. Lyene pitulukeni mu calembwa cenu ica ku ŋanda ne ŋanda pa ntanshi ya kubwelelako, kabili peeleniko itontonkanyo lyabamo ipepo ku co muli no kusosa.
3 Nomba namuipekanya. Cinshi mwingasosa? Nga ca kuti mwashilile mwine ŋanda icipusho pa kutandala kwa kubalilapo, kuti lyene mwakuula pali uyo mutwe we lyashi lintu mwabwelelako. Ku ca kumwenako, nga ca kuti ukutandala kwa kubalilapo kwashimpilwe pa mapaalo ya Bufumu bwa kwa Lesa, kuti mwaimya icipusho ca kuti “Mulandu nshi Lesa asuminishisho bubifi?”
Lintu mwabwelelako, pa numa ya kuilondolola mwe bene, kuti pambi mwatila:
◼ “Lintu twalanshenye umuku walekelesheko, twalandile pa mulandu Lesa wa kutemwa asuminishisho bubifi bwafulishe fi ilelo. Bushe mwalitontonkanyapo mu kulundapo pali ico? [Lekeni ankuleko.] Bushe muletontonkanya Lesa mu cituntulu alasakamana umutundu wa muntu? [Lekeni ankuleko.] Langulukeni cintu Baibolo isosa pali Yohane 3:16.” Pa numa ya kubelenga icikomo, kuti mwayalwila ukusakamana ku mbali sha kulungatika isha cipandwa 8 mu Icine Icitungulula ku Bumi bwa Ciyayaya, icilondolola imilandu Lesa asuminishisho bubifi ilelo.
4 Icipusho na cimbi ica kubalamuna itontonkanyo mwingasha pa kutandala kwenu ukwa kubalilapo kuti caba: “Nga ca kuti Lesa afwaile umuntu ukwikala kuli pe na pe, mulandu nshi abantu bakotela no kufwa?” Lintu mwabwelelako, kuti mwabalanga icasuko ca mu Baibolo kuli ico cipusho nga fintu cisangwa pa Abena Roma 5:12. Pa numa ya kubelenga ilembo, losheni kuli paragrafu wa kubalilapo pe bula 36 ilya citabo Bushe Ubu E Bumi Bweka Bwabako?, icilondolola umulandu wa kutendekelako uo umuntu akotela no kufwa.
5 Nga ca kuti pa kutandala kwenu ukwa kubalilapo mwalanshenye inshila sha kwishibilamo ubutotelo bwa cine kabili mwashile icitabo Ukusapika Lesa Ukwa Mutundu wa Muntu, icipusho cisuma apo mwingashimpa icipempu cenu ica kubwelelamo kuti pambi caba ca kuti: “Ni shani fintu amabutotelo yafulishe fi yaishileko?” Lintu mwabwelelako, kuti mwalanda pa lwa fishinka fya kulungatika mu cipandwa 2 ica cilya citabo.
6 Pano palipo ukusoka. Beni abasakamana pa lwa fipusho muleipusha lintu mwabwelelako. Ukwipusho kuti “Bushe mwalibelengele ifyebo namushilile?” nelyo “Bushe mulenjibukisha?” nelyo “Bushe muleibukisha ico twalanshenyepo inshita yalekelesheko nali pano?” kukongamina ku kulenga mwine ŋanda insoni. Ifipusho fya musango yo ilingi line tafifumamo ifisabo fisuma. Pa lubali lumbi, beni aba bucibusa, abakondenkana, kabili ipifyeni. Iyi mibele ikakusha ubukombe.
7 Iyi ne mitununukile imbi kuti yabomfiwa ku kulundulula ukutesekesha mu mitima ya balesekelela. Mulandu nshi te kwimikila ubuyo bwa pa lwenu ubwa kucitapo nangu fye icipempu ca kubwelelamo cimo cila mulungu? Bomfyeni bwino imitubululo ibomba iipeelwe pa muulu, kabili fwailisheni bakasabankanya babelesha abakamwaafwa. Insansa shenu shikengilishiwako ilyo mwakuula pa buseko bwa kubalilapo pa kucite fipempu fya kubwelelamo ifya kufumamo cimo.