Tufwile Ukuipekanya Ukushimikila Lyonse
1. Twaishiba shani ukuti abena Kristu ba kubalilapo baleipekanya ukushimikila lyonse?
1 Abena Kristu ba kubalilapo bali abacincila pa kubila imbila nsuma kabili balebila “ukwabula ukuleka” konse uko balesanga abantu. (Imil. 5:42) Kanshi te kuti tulande ukuti ilyo baleya balebila imbila nsuma ukufuma ku ng’anda ne ng’anda balepitilila abo balesanga mu musebo ukwabula ukubashimikila. Kabili tabalefilwa ukushimikila abo balesanga pa maliketi ilyo baleshita ifintu pa numa ya kupwisha umulimo wa kushimikila. Nga filya fine Yesu alecita, nabo bene baleipekanya ukushimikila lyonse.—Marko 6:31-34.
2. Ishina lyesu ilya kuti Inte sha kwa Yehova lilangilila cinshi?
2 Tuleipekanya Lyonse: Ishina lyesu ilya kuti, Inte sha kwa Yehova, talilangilila fye umulimo tubomba; lelo lilalanga ne fyo twaba. (Esa. 43:10-12) Kanshi lyonse tulaipekanya ukulanda pe subilo lyesu, na lintu tatuleshimikila ku ng’anda ne ng’anda. (1 Pet. 3:15) Bushe mulatontonkanyapo pa fingalenga mwabombako ubunte bwa mu lyashi lyena no kutontonkanya pa fyo mwingalanda? Bushe lyonse mulasenda impapulo pa kuti mwingashalika ku bengatemwa ukumfwa icine? (Amapi. 21:5) Bushe mushimikila fye ku ng’anda ne ng’anda, nelyo bushe mulashimikila na mu fifulo fimbi umo mwasanga abantu nge fintu fili fye bwino?
3. Bushe ukushimikila mu fifulo fya makwebo, umwa kwangalila, mu misebo, no mwa kwimika imyotoka, ne fifulo fimbi, kwalicindama?
3 Inshila na Imbi Iyacindama: Kale twalemona kwati ukushimikila mu misebo, ififulo basungilapo imyotoka, umo abantu bangalila, mu fifulo fya makwebo, e lyo ne fifulo fimbi ifyashala kwati takwacindama sana. Lelo nga twatila ukushimikila kwa musango yu takwacindama sana, ninshi tuletila iyi te nshila tulingile ukushimikililamo kabili kuti twasalapo ukubomfya iyi nshila nelyo iyo. Umutumwa Paulo atile aleshimikila “pa bantu” na ku ng’anda ne ng’anda. (Imil. 20:20) Kanshi ukushimikila “pa bantu” nangu pa cintubwingi nako kwine kwalicindama nga nshi. Ca cine ukuti ukushimikila ku ng’anda ne ng’anda e nshila ya kubalilapo kabili iyawamisha iyo tutwalilamo imbiIa ya Bufumu ku bantu. Nangu cibe fyo, abena Kristu ba kubalilapo abalebila imbila nsuma, balebika sana amano ku bantu, te ku mayanda. Baleshimikila sana abantu icine icaba mu Baibolo, babe ni pa cintubwingi, ilyo balelanda fye ilyashi, e lyo na ku ng’anda ne ng’anda. Na ifwe tulecita cimo cine pa kuti tulebombesha umulimo wesu onse.—2 Tim. 4:5.