Muleba Abacenjela Ilyo Muleshimikila
1. Mulandu nshi tufwile ukubela abacenjela ilyo tuleshimikila?
1 “Nge mpaanga mu mimbulu,” ababomfi ba kwa Lesa baleshimikila mu “nkulo iyapondama kabili iyapotama.” (Mat. 10:16; Fil. 2:15) Amalipoti aya kutiinya aya fimfulunganya fya bana calo, amabumba ya bantu abacita ulukakaala, ukwikata abantu no kubasenda ku maka nafifulisha. Ifi fyonse bushininkisho bwa kuti abantu baleya “balebipilako fye.” (2 Tim. 3:13) Mafunde nshi aya mu Baibolo ayengatwafwa “ukuba abacenjela” ilyo tuleshimikila?—Mat. 10:16.
2. Finshi ifingalenga ukuti tuleke ukushimikila mu cifulo twacilashimikilamo no kuya ku ncende imbi?
2 Mulesalapuka: Amapinda 22:3 yatukoselesha ukuba na mano pa kuti ‘twabelama’ nga twamona ububi. Mulelola! Ifintu mu ncende umwaba umutende kuti fwayaluka ukwabula ukwenekela. Limbi kuti mwamona amabumba ya bakapokola mu misebo nelyo amabumba ya bantu ayengi. Limo limo abo tuleshimikila kuti batusokako. Ukucila ukuwayawaya pa kuti mwishibe ifilecitika, kuti cawama ukusalapuka no kufumapo mu kwangufyanya no kuya mu kushimikila ku ncende imbi.—Amapi. 17:14; Yoh. 8:59; 1 Tes. 4:11.
3. Kuti twabomfya shani ifyebo ifyaba pali Lukala Milandu 4:9 ilyo tuleshimikila?
3 Mulebomba na Bambi: Lukala Milandu 4:9 itila: “Ukuba babili kwawama ukucila ukuba weka.” Kuti limbi mwalibelesha ukubomba mu mulimo mweka ukwabula ubwafya, bushe na nomba kuti caba fye bwino ukulabomba mweka? Mu ncende shimo, kuti mwabomba. Lelo mu ncende shimbi, te kuti ciwame nkashi nelyo uwacaice ukubomba ku ng’anda ne ng’anda eka, maka maka icungulo. Casangwa ukuti nga muli no munenu uubika amano ku filecitika cilafwa sana. (Luk. Mil. 4:10, 12) Ilyo muleshimikila mulebika amano na ku bo muli nabo mwi bumba. Nga ca kuti mwafwaya ukufuma mu cifulo ca kushimikilamo, kuti cawama ukwebako abo mulebomba nabo.
4. Bushe bonse mu cilonganino kuti bacita shani pa kuti baicingilile?
4 Apo baeluda e ‘balinda imyeo yesu,’ e bakwata umulimo wa kwishiba ifingabomba bwino ukulingana ne ncende twikalako. (Heb. 13:17) Yehova akatupaala nga tule-enda bufuke bufuke no kulaumfwila baeluda muli fyonse. (Mika 6:8; 1 Kor. 10:12) Kuti cawama nga ca kuti ababomfi ba kwa Lesa bonse balebombako sana umulimo wa kushimikila mu cifulo ca kushimikilamo, lelo balingile ukuba abacenjela lyonse.