Ifintu 12 Ifilenga Tuleshimikila

Mulandu nshi tushimikila ku ng’anda ne ng’anda e lyo no kutungulula amasambililo ya Baibolo? Bushe tufwaya fye ukwafwa abafwaya ukusambilila icine ukwingila mu musebo wa ku mweo wa muyayaya? (Mat. 7:14) Uyu e mulandu wa kubalilapo uulumbwilwe pe samba lelo te mulandu uukalamba ulenga tuleshimikila. Pa fintu 12 ifilenga tuleshimikila, ni cili kwi ico mwamona ukuti e cilenga tuleshimikila?

1. Ukushimikila kula-afwa abantu ukupusuka.—Yoh. 17:3.

2. Ilyo tuleshimikila, tulasoka ababifi.—Esek. 3:18, 19.

3. Ilyo tushimikila, tulafikilisha ubusesemo bwa mu Baibolo.—Mat. 24:14.

4. Umulimo wa kushimikila ulalenga ubulungami bwa kwa Lesa ukumoneka. Takuli nangu umo uwingapeela Yehova umulandu wa kuti aonaula ababifi ukwabula ukubapeela inshita ya kulapila.—Imil. 17:30, 31; 1 Tim. 2:3, 4.

5. Ukushimikila kulalenga twalipila inkongole sha kwaafwa abantu abashitilwe no mulopa wa kwa Yesu ukwishiba Lesa.—Rom. 1:14, 15.

6. Ukushimikila kulalenga twaba aba kaele ku mulopa wa bantu. —Imil. 20:26, 27.

7. Ukushimikila e kukalenga tukapusuke.—Esek. 3:19; Rom. 10:9, 10.

8. Ukushimikila kulanga ukuti twalitemwa abanensu.—Mat. 22:39.

9. Ukushimikila kulanga ukuti twaliba aba cishinka kuli Yehova na ku Mwana wakwe.—Mat. 28:19, 20.

10. Ukushimikila lubali lwa kupepa.—Heb. 13:15.

11. Ukushimikila kulanga ukuti twalitemwa Lesa.—1 Yoh. 5:3.

12. Ukushimikila kulalenga ishina lya kwa Yehova ukuba ilya mushilo.—Esa. 43:10-12; Mat. 6:9.

Kwena iyi, te milandu fye yeka iilenga tuleshimikila. Ku ca kumwenako, ukushimikila kulakosha icitetekelo cesu kabili kulatupeela ishuko lya kubombela pamo na Lesa. (1 Kor. 3:9) Na lyo line, umulandu walenga 12, e mulandu uukalamba ulenga tuleshimikila. Te mulandu nelyo abantu basumine nelyo bakaane ukumfwa, ukushimikila kulalenga ishina lya kwa Lesa ukuba ilya mushilo kabili kulalenga Yehova ukwasuka uumuseebanya. (Amapi. 27:11) Cine cine, twalikwata imilandu iisuma iilenga ‘tulesambilisha no kubila imbila nsuma ukwabula ukuleka.’—Imil. 5:42.