Ipekanyeni Ukusangwa ku Cibukisho no Mutima wa Nsansa
1. Bushe inshita ya Cibukisho ni nshita ya kucita cinshi?
1 Icibukisho icikabako pali Cibili, pa 26 March, cikalenga tukasekelele pa nshila Lesa apekanya iya kutupusushishamo. (Esa. 61:10) Nangu fye ni lintu Icibukisho cishilafika, ukuba ne nsansa kukalenga tukapekanye bwino Icibukisho. Nomba kuti twacita shani pa kuti tube ne nsansa ilyo tulepekanya Icibukisho?
2. Cinshi cilenga tulebombesha ukupekanishisha Icibukisho?
2 Ukupekanishisha Icibukisho: Kwena ukusefya Icibukisho takusenda inshita iikalamba sana, lelo kwalicindama sana. Kanshi, tulingile ukupekanishisha kabela pa kuti tatushileko fimo ifyacindama. (Amapi. 21:5) Ku ca kumwenako, mulingile ukusala inshita ne cifulo apo mukalonganina, ukufwaya umukate no mwangashi ififwile ukubomfiwa pa Cibukisho, ukuwamya apo mukalonganina e lyo no kupitulukamo ifyo mukapishamo ifimpashanya, no kweba bakapyunga ifyo bakabomba. Kalanda na o afwile ukupekanya bwino ilyashi. Tatuletwishika ukuti pali ino nshita mwalipekanya kale ifingi pali ifi twatantawila. Insansa twakwata pa mulandu wa cilubula Lesa atupeela, eshilenga tulepekanya bwino uku kulongana kwa mushilo.—1 Pet. 1:8, 9.
3. Kuti twapekanya shani imitima yesu ku kusefya Umulalilo wa kwa Shikulu?
3 Ukupekanya Umutima: Cimbi icacindama ico tulingile ukucita, kupekanya umutima pa kuti tukomfwikishe ubucindami bwa Cibukisho. (Esra 7:10) Pa kuti tupekanye imitima yesu, tulingile ukutantika inshita ya kubelenga Amalembo yalya tubelenga mu nshita ya Cibukisho, e lyo no kutontonkanya pa fyalecitika mu nshiku sha kulekeleshako ilyo Yesu ali pano calo. Ukutontonkanya sana pa fyo Yesu aipeele pa mulandu wesu kukalenga tulemupashanya.—Gal. 2:20.
4. Finshi mwanonkelelamo mu cilubula ifimiletela sana insansa?
4 Imfwa ya kwa Kristu yalenga cimoneke apabuuta tuutu ukuti Yehova e walinga ukuteka. Yalitulubula ku lubembu ne mfwa. (1 Yoh. 2:2) E lyo kabili, yalenga twaba ne shuko lya kuba ifibusa fya kwa Lesa no kwisaikala umuyayaya ku ntanshi. (Kol. 1: 21, 22) Na kabili, imfwa ya kwa Yesu ilalenga twapampamina sana pa kwikala ukulingana no kuipeela kwesu kuli Yehova no kutwalilila ukuba abasambi ba kwa Kristu abakosa. (Mat. 16:24) Ilyo mulepekanishisha Icibukisho, na lintu mukasangwako, shi insansa mwakwata shikafulileko!