Bushe Muleipekanya ku Cibukisho?

Ilyo ubushiku bwa Nisani 13 mu mwaka wa 33 C. E. bwafikile Yesu alishibe ukuti bwali e bushiku bwa kulekeleshako ukuba pamo na basambi bakwe. Ali no kusefya nabo Ica Kucililla no kutendeka ukusefya ukupya ukwali no kuilatwa ukuti Umulalilo wa kwa Shikulu. Apo uku kusefya kwali ukwacindama balingile ukupekanya bwino. E ico atumine Petro na Yohane ukuyapekanishisha limo Ica Kucilila. (Luka 22:7-13) Ukutula lilya, cila mwaka Abena Kristu balapekanya bwino Icibukisho. (Luka 22:19) Finshi fimo ifyacindama ifyo tulingile ukucita pa kuti tupekanye ukusefya Icibukisho icikabako pa 3 April?

Ifyo Baeluda Bafwile Ukucita:

Lanshanyeni nga ca kuti mukabomfya ing’anda ya Bufumu nelyo icifulo cimbi. Icifulo mukalonganinapo cifwile ukukwata ifipuna ifingi, ulubuto ulusuma, e lyo no mwela. Na kabili, mulingile ukupekanya ukuti kukabe ukuwamya apo mukalonganina Icibukisho.
Saleni bwino uwa kulanda ilyashi, ceyamani, e lyo na bakupepa pa mukate na waini.
Nga ca kuti kukaba icilonganino na cimbi icikalalonganina pali ico cifulo, umfwaneni inshita sha kulongana, uko mukalaingilila no kufumina, e lyo na uko imyotoka shikalaingilila na uko shikalafumina.
Saleni abakabomba bukapyunga na bakalapishamo ifimpashanya no kubebela limo ifyo bakabomba.
Fwaileni limo uko mukafumya ifimpashanya, imbale na makapu, itebulo, e lyo ne nsalu sha pe tebulo.

Ifyo Bakasabankanya Bengacita:

Pekanyeni ukuti mukabombeshe ukwita abantu ku Cibukisho.
Lembeni amashina yabo musambilisha Baibolo, balupwa, abo musambilila nabo, abo mubomba nabo, e lyo na bantu bambi abo mwaishiba no kubalalikako ku Cibukisho.
Mukalebelenga no kutontonkanya pa Malembo ya mu nshita ya Cibukisho.
Nga mwaya ku Cibukisho mukalepokelela abakalaisa.