Imbila ya Bufumu Na. 38 iyo Tukalashalika mu November!

1. Mepusho nshi abantu bepusha pa bafwa, kabili aya mepusho yakasukwa shani mu November?

¹ Imfwa mulwani wa bantu bonse, te mulandu ne fyo basuminamo. (1 Kor. 15:26) Abantu abengi tabaishiba uko abafwa baba kabili tabaishiba nga bakabamonapo na kabili. Kanshi mu mweshi wa November ifilonganino mwi sonde lyonse fikalashalika Imbila ya Bufumu Na. 38 iikwete umutwe uuleti, Bushe Cine Cine Abafwa Kuti Baba aba Mweo na Kabili? Iyi kampeni yaibela ikatendeka pa November 1. Lyena kampeni nga yapwa, tukatwalilila ukushalika Imbila ya Bufumu Na. 38 filya fine tushalika amatrakiti.

2. Bushe Imbila ya Bufumu Na. 38 bailemba shani?

² Ifyo Bailemba: Imbila ya Bufumu Na. 38 bali-ilemba bwino sana ica kuti nga mwaipeta, ninshi pe bula lya kubalilapo palaba umutwe pamo na mashiwi ya kuti, “Bushe kuti mwayasuka ukuti . . . ee? awe? nalimo?” Uulebelenga Imbila ya Bufumu nga akupukula, akalasanga icasuko ca mu Baibolo ku cipusho cili pe bula lya kubalilapo e lyo ne fyo amalayo yaba mu Baibolo yengamwafwa. Na kabili akamona ico afwile ukusuminina ukuti ifyo Baibolo yalaya pa bafwa fikacitika. Pe bula lya kulekeleshako ilya Imbila ya Bufumu pali icipusho icisuma sana ico uulebelenga engashala aletontonkanyapo kabili pali na mashiwi ya kumulalika ukusambilila na fimbi.

3. Bushe tukalashalika shani Imbila ya Bufumu Na. 38?

³ Ifyo Tukabomba: FiIya fine tucita pa kwita abantu ku Cibukisho na ku kulongana kwa Citungu, e fyo tukalacita na muli iyi kampeni. Baeluda bakapekanya ifyo icilonganino cikabomba pa kuti bakapwishe icifulo bashimikilamo nge fyo babebele muli kalata ya pa April 1, 2013. Ifilonganino ifishakwata icifulo ca kubombelamo icikalamba kuti balomba ukwafwako ifilonganino fya mupepi ifyakwata ififulo fya kubombelamo ifikalamba. Ilyo mulesenda Imbila ya Bufumu Na. 38, mufwile ukupoka fye iyo mwingakumanisha ukushalika mu mulungu. Ilyo kukaba iyi kampeni, mulingile ukushalika ku ng’anda ne ng’anda mu cifulo ca cilonganino cenu conse, lyena nga mwapwisha amayanda yonse kuti mwatendeka ukulashalika na lintu muleshimikila ku cintubwingi. Nga mwapwisha ukushalika Imbila ya Bufumu ilyo umweshi ushilapwa, kuti mwatendeka ukushalika impapulo isho tukalashalika mu November. Pa Cibelushi ca kubalilapo mu November, tukabika sana amano ku kushalika Imbila ya Bufumu ukucila ukubika amano ku kutendeka amasambililo ya Baibolo. E lyo pa mpela ya cila mulungu, kuti tuleshalika na magazini. Bushe mwalatendeka ukuipekanya pa kuti mukabombeko sana iyi kampeni yaibela?