Ifya Kucita pa Kupekanya Amashiwi ya Kubalilapo Ukulanda

1. Mulandu nshi amashiwi ya kubalilapo ukulanda yacindamina?

¹ Ifya kulya fimo filalenga umuntu ukufwaisha ukuliilapo na fimbi. E fyaba na mashiwi yasuma ayo tulanda pa ntendekelo, kuti yalenga umuntu ukufwaisha ukumfwilapo na fimbi ifyaba mu Baibolo. Amashiwi ya kubalilapo ukulanda, limo kuti yaba fye ayepi, e lyo ne fyo twingalandapo na fyo kuti fyaba ifyapusanapusana, lelo filya fine caba na ku fya kulya, lyonse tufwile ukupekanishisha calimo amashiwi ya kubalilapo ukulanda. (Amapi. 15:28) Nomba kuti twapanga shani intendekelo iisuma?

2. Kuti twapekanya shani amashiwi ya kubalilapo ukulanda ayo abantu bengatemwa?

² Saleni Amalyashi ayo Bengatemwa: Intendekelo yesu ilingile ukuba iisuma ica kuti abo tuleshimikila bafwaisha no kumfwilapo na fimbi. Lelo, intendekelo nga taiweme, abo tuleshimikila kuti bakaana ukulanshanya nabo. Kanshi ilyo mulepekanya, muletontonkanya pa fyo abantu uko mwikala bengatemwa ukumfwa. Bushe abantu uko mwikala kuti batemwa ukukwata ubuteko ubusuma, ukuba ne nsansa mu lupwa, nelyo ukufwaisha ukuti inkondo ikapwe? Abantu ilingi line balatemwa ukulanda ifili ku mukoshi, e ico mulepekanya icipusho icingalenga balanda ifyo batontonkanya. Kuti mwabomfya ifyebo fiba mu Ubutumikishi Bwesu Ubwa Bufumu ifilanda pa fyo mwingatendeka ukulanshanya no muntu, no kufibomfya ukulingana ne fyo icifulo mushimikilamo caba. Bushe limo limo te kuti mweshe ukulapekanyako amashiwi ya kubalilapo ukulanda mu mulimo wa mwi bala ilyo mulecita Amapepo ya Lupwa?

3. Mulandu nshi cacindamina ukutontonkanya pa ntambi ne nkulilo sha bantu baba mu cifulo tushimikila?

³ Muletontonkanya pa Ntambi ne Nkulilo: Mu ncende shimo shimo, abantu benekela ukuti tulelanda bwangu ico tukonkele. E lyo mumbi namo bafwaya ukuti twabala twaipusha ifyo abene ba ng’anda bali e lyo nalimo no kuilondolola bwino. Mu ncende shimbi, mwaba abantu abacindika ifya kwa Lesa, kabili ici cilenga ukuti ciletwangukila ukulanda nabo ifyaba mu Baibolo mu mashiwi fye ya kubalilapo. (Imil. 2:14-17) Lelo nga tuleshimikila mu ncende umwaba abantu abashili Bena Kristu, nelyo abashipepa ukuli konse, limbi kuti cawama ukulanda pali Baibolo umuku umbi ilyo mwabwelelelako, ukucila ukulandapo pa muku wa kubalilapo.—Imil. 17:22-31.

4. Cinshi tulingile ukubikila amano ku mashiwi ayo tubalilapo ukulanda ilyo tuleshimikila?

⁴ Amashiwi ya Kubalilapo: Pekanyeni bwino bwino amashiwi aya kubalilapo ukulanda. Amashiwi ayepi kabili aya-anguka ilingi line e yawama. Inshila tulandilamo amashiwi ya kubalilapo nayo yalicindama nga nshi. Mufwile ukucincimuka pa kulanda. Mulemwentula no kulanga ati namubika amano kubo muleshimikila. Ukukonka ifi twalandapo kuti kwatwafwa ukupekanya bwino amashiwi ya kubalilapo ukulanda ayengalenga abantu mu cifulo tushimikila ukufwaisha ukulya “ifya kulya fya kwa Yehova.”—1 Kor. 10:21.