Ifingatwafwa Ukulashimikila Bwino—Tulepekanya Amashiwi ya Kubalilapo Ukulanda

Ico Cacindamina: Nga ca kuti abo twasanga pa ng’anda tabatemenwe ifyo twabalilapo ukulanda, nalimo kuti bakaana ukubashimikila. E ico, bakasabankanya abengi balishiba ukuti amashiwi babalilapo ukulanda e yacindama sana. Nangu ca kuti mu Ubutumikishi Bwesu Ubwa Bufumu na mu citabo ca Ukupelulula mulaba amashiwi twingalanda pa kutendeka ukushimikila, tabatweba ifyebo fyonse ifyo twingalanda. Kanshi kuti tulealula ifyebo ukulingana ne fyo twalalandapo. Nangu batweba fyonse ifya kulanda, kuti twa-alula nelyo ukupekanya fimbi. Kanshi tukalashimikila bwino nga tulesala bwino amashiwi ya kubalilapo ukulanda ukucila ukulanda fye ifyo twatontonkanya ilyo twafika pa ng’anda.—Amapi. 15:28.

Ifyo Mwingacita:

Saleni ifyo mulefwaya ukulandapo. Ifyo mwasala fifwile ukuba mu mpapulo muleshiila abantu kabili fifwile ukuba ifyo abantu mu cifulo mushimikila bengatemwa.
Pekanyeni bwino amashiwi mwalabalilapo ukulanda pa numa ya kubaposha kabili yalandeni muli sentensi imo nelyo yabili. Nalimo kuti mwatendeka ati: “Ico naishila ni co . . . ,” “Abantu abengi baletontonkanya sana pa . . . ,” “Kuti natemwa ukwishiba ifyo imwe muletontonkanyapo pa . . . ,” nelyo kuti mwabomfya amashiwi yambi. Amasentensi ayepi kuti yalenga ifyo mulelanda fyaumfwika bwino. Bakasabankanya bamo balaswatila amashiwi ya kubalilapo ukulanda.
Muleipusha amepusho ayengalenga abo mwasanga pa ng’anda bafwaya ukulanshanya na imwe. (Mat. 17:25) Muleibukisha ukuti nalimo abo mwasanga bacilatontonkanya pali fimbi ilyo mushilaisa, kanshi tamufwile ukwipusha icipusho icakosa nelyo icingabatulumusha.

Mukesheko Ukucita ifi Muli uno Mweshi:

Nga muli pa mapepo ya lupwa, mulepekanyako na mashiwi ya kubalilapo ukulanda pa kushimikila e lyo no kupitulukamo.
Nga muleshimikila, mule-ebako bakasabankanya bambi ifyo mupekenye ukulanda. (Amapi. 27:17) Kuti mwa-alula ifya kulanda nga mwamona ukuti ifyo mupekenye teti fibombe bwino.