Umukululo Wa Mepusho

◼ Bushe bakasabankanya bafwile ukulabomfya Intaneti pa kushimikila nelyo ukusambilila Baibolo na bantu abo bashaishiba abekala ku calo cimbi?

Bakasabankanya bamo balabomfya Intaneti ukutendeka ukusambilila Baibolo na bantu abekala mu fyalo umo babinda umulimo wa kushimikila nelyo umwaba fye bakasabankanya abanono. Limo limo, ukucita ifi kulalenga abantu ukusambilila Baibolo. Na lyo line, kulaba ifyabipa ificitika nga ca kuti bakasabankanya balelembeshanya nelyo ukulanshanya na bantu abo bashaishiba pa Intaneti. Nangu ca kuti ico bamunyinefwe bacitila ifi kufwaya ukushimikila abantu abengatemwa ukukutika ku mbila nsuma ya Bufumu, lelo ukulanshanya na bantu abo mushishibe kuti kwalenga mwatendeka ukulalanshanya na bantu ababipa, e lyo na basangu. (1 Kor. 1:19-25; Kol. 2:8) Na kabili, mu fyalo umo balesha nelyo babinda umulimo wa kushimikila pa Bufumu, aba mubuteko nalimo kuti bafwaya ukwishiba ifyo mulanshanya kabili ici kuti calenga bamunyinefwe muli ifyo fyalo ukuba mu bwafya. Kanshi, bakasabankanya tabafwile ukubomfya Intaneti pa kufwaya ukulashimikila imbila nsuma abantu aba ku fyalo fimbi.

Ilyo twashimikila umuntu uwaisa mu kutandala ukufuma ku calo cimbi, tufwile fye ukutwalilila ukulalanshanya nankwe ifya mu Baibolo nga abwelelamo ku mwabo nga ca kuti iofeshi lya musambo lyatweba ukucita ifyo. Nomba nga talitwebele, kuti twamulanga fye ifya kubomfya Webu saiti ya jw.org pa kuti akatwalilile ukubelenga impapulo shesu nelyo ifyo engasanga iofeshi lya musambo mu calo cabo. Kuti twamukoselesha ukuya na ku Ng’anda ya Bufumu iyabela ku cifulo ekala. Kwena, mu fyalo fimo tamwaba Amayanda ya Bufumu. Nga ca kutila kuti atemwa ba Nte ukumutandalila, tufwile ukulemba formu iitila Mukwai Fwayeni Uyu Muntu (S-43) no kupeela kalemba mu cilonganino cesu, uukabomfya adresi ya cilonganino iyaba pa Webu saiti ya jw.org, no kutuma ku calo ukwikala uyo muntu. Iofeshi lya musambo ilyangalila ico calo ukwikala uyo muntu lyalishiba ifyo ifintu fyaba muli ico calo, kabili e lingapekanya ifyakwafwa uulefwaya ukusambilila Baibolo.—Moneni Ubutumikishi Bwesu Ubwa Bufumu ubwa June 2014, ibu. 7, no bwa November 2011, ibu. 2.

Nga ca kuti umuntu uo tulelanshanya nankwe aya ku calo cimbi nelyo nga tulasambilila Baibolo ukubomfya Intaneti no muntu uwaba ku calo cimbi uo tushaishiba bwino, tufwile ukucita ifi batweba. Na lyo line, tufwile ukutwalilila ukulanshanya na uyo muntu mpaka kasabankanya umbi kuli ico calo akatendeke ukulanshanya nankwe. Nangu cibe fyo, nga uyo muntu ekala mu calo umo balesha nelyo ukubinda umulimo wa kushimikila, tufwile ukucenjela sana ilyo tulelanshanya nankwe ifya mu Baibolo mu makalata, pa foni, nelyo pa Intaneti.—Mat. 10:16.