Bushe Mwalipekanya Ifyo Mukacita mu Calo nga Mwaba Ifimfulunganya?

Apo cino calo cili mupepi no kupwa, tulingile ukulaenekela ifintu pamo nga ifimfulunganya, ukusansa kwa tupondo, ne nkondo ukufulilako. (Ukus. 6:4) Kuti twaipekanishisha shani libela kuli aya mafya?

• Muleshininkisha ukuti namuipekanya ukutwalilila ukuba aba cishinka: Mulingile ukwishiba amashinte ya mafunde ya mu Baibolo, na malyashi ayengalenga mwacetekela sana Yehova ne cilonganino cakwe. Nga mwayeshiba mukatwalilila ukukanaba ulubali lwa calo. (Amapi. 12:5; jr amabu. 125-126 amapara. 23-24) Ino e nshita tulingile ukulakosha bucibusa bwesu na ba mu cilonganino.—1 Pet. 4:7, 8.

• Muleshininkisha ukuti namukwata ifyo mukabila pa kuti mube no bumi ubusuma: Mulepangila libela ifyo mwingaicingilila nga mwafilwa ukubutukapo pa ng’anda kabili mulesungila limo ifintu fimo ifyo mwingakabila. Na kabili mulepekanishisha libela ifyo mwingacita nga mwasalapo ukubutukapo pa ng’anda. Mulemona ifili mu cola cenu umo musungila ifyo mwingakabila nga kwaba ubusanso, kabili kuti mwabikamo ne fintu pamo nga ifya kufimba pa mona na pa kanwa, ifya kufwala ku minwe, ne ndalama. Mulingile no kwishiba inshila mwingabomfya pa kulanshanya na baeluda, kabili mufwile ukubeba uko bengamusanga.—Esa. 32:2; g17.5 amabu. 3-7

Ilyo kuli ifimfulunganya mu calo, muletwalilila ukucita ifyo mucita lyonse pa kupepa Yehova pamo nga ukuisambilisha, ukupepa no kulongana. (Fil. 1:10) Mwilaendauka kano fye nga mulefwaya ukubutukako kuli ico cifulo. (Mat. 10:16) Mulepeelako bambi ifya kulya ne fintu fimbi.—Rom. 12:13.

TAMBENI VIDIO ITILA BUSHE MWALIIPEKANYA KU BUSANSO UBWINGACITIKA? LYENA ASUKENI AYA MEPUSHO:

• Bushe Yehova kuti atwafwa shani nga kuli amasanso?

• Finshi tulingile ukucita pa kuti tuipekanishishe libela?

• Kuti twa-afwa shani abaponenwe na masanso?