IFYO FWE BENA KRISTU TULINGILE UKULAIKALA

Bushe Mwalipekanya Ifyo Mwingacita Ubunonshi mwi Sonde nga Bwaya Panshi?

Tacitupapusha nga ca kuti ifilecitika mwi sonde fyalenga ubunonshi mu fyalo fyonse bwaya panshi. Cinshi tushipapila? Pantu tuleikala ku mpela ya nshiku sha kulekelesha, kabili Baibolo itweba ukuti tatufwile “ukucetekela ifyuma ifishibelelela.” (1 Tim. 6:17; 2 Tim. 3:1) Bushe ifyo Imfumu Yehoshafati yacitile kuti fyatusambilisha finshi pa fyo twingaipekanya ubunonshi mwi sonde nga bwaya panshi?

Ilyo inko shalefwaya ukwisa mu kubasansa, Yehoshafati alicetekele Yehova. (2 Imila. 20:9-12) Na kabili alicitilepo fimo ifyali no kubafwa, pamo nga ukukosha imisumba no kubikamo amabumba ya bashilika. (2 Imila. 17:1, 2, 12, 13) Nga filya fyacitile Yehoshafati na ifwe tulingile ukucetekela Yehova no kucitapo fimo ifingatwafwa lintu ifintu fya-afya.

FINSHI TWINGACITA PA KUTI TUIPEKANYE ILYO UBUNONSHI MWI SONDE BUSHILAYA PANSHI?

Mufwile ukukosha bucibusa bwenu na Yehova: Muleteka umutima ku fyo mukwete, kabili mulecetekela ukuti Yehova akulamupeela ifyo mulekabila cila bushiku. (Mat. 6:26; 1 Tim. 6:8) Tamufwile ukuleka ukukonka amashinte ya mafunde ya mu Bailolo pa kuti fye mukwate ifyo mulekabila. (Rom. 2:21) Mufwile ukutontonkanya pa fyo mwingacita pa kuti mutwalilile ukubelenga Baibolo ne mpapulo ishilanda pali Baibolo, nga ca kuti amalaiti na Intaneti takuli. Kuti mwasungako impapulo shimo ishapulintwa kabili nga kuti mwakumanisha kuti cawama mwakopolwela limo impapulo pali foni nelyo tabuleti.

Mufwile ukupekanishako limo ifya kulya ne fintu fimbi: Mufwile ukucefyako inkongole no kukanalashita ifintu icishiteshite ilyo ubunonshi mwi sonde bushilaya sana panshi. (Amapi. 22:7) Nga kuti mwakumanisha, kuti cawama mwasungako ifya kulya fimo e lyo ne fintu fimbi ifya kubomfya. Bamo kuti basalapo no kulimako akalibala ka musalu pa kuti tabalebomfya sana indalama.

TAMBENI VIDIO ITILA BUSHE MWALIIPEKANYA KU BUSANSO UBWINGACITIKA? LYENA ASUKENI AMEPUSHO YAKONKAPO:

Ifikope fya muli vidio itila “Bushe Mwaliipekanya ku Busanso Ubwingacitika?” Pali Baibolo, icola ca kulongamo ifikabilwa nga kwaba amasanso na foni, na balebomba mu makuule.

Finshi bonse tufwile ukucita pa kuipekanya ku busanso ubwingacitika?

Icasuko cenu

Ifikope fya muli vidio itila “Bushe Mwaliipekanya ku Busanso Ubwingacitika?” Bamunyinefwe baleafwa abaponenwa na masanso, balekula no kulongolola ifintu muli motoka.

Kuti twaipekanya shani ukwafwa bambi?

Icasuko cenu