2 | “Ifyo Amalembo Yatusansamusha”

IFYO BAIBOLO ILANDA: “Pantu fyonse ifyalembelwe kale fyalembelwe ku kutufunda, pa kuti mu kushipikisha kwesu na mu cisansamushi ca mu Malembo tube ne subilo.”—ABENA ROMA 15:4.

Umo Aya Mashiwi Yalola

Mu Baibolo mwaliba amashiwi ayatusansamusha ayalenga twatwalilila ukuba abakosa, e lyo no kulatontonkanya pa fintu ifisuma. Kabili Baibolo ilalenga twaba ne subilo lya kuti nomba line fye tukaleka ukutontonkanya pa fyabipa.

Ifyo Ifi Fingatwafwa

Bonse fye tulaba no bulanda inshita shimo, lelo abalwala amalwele ya matontonkanyo bena inshita iikalamba balaba sana no bulanda. Bushe Baibolo kuti yatwafwa shani?

Mu Baibolo mwaliba ifintu ifisuma ifilenga twilatontonkanya pa fyabipa. (Abena Filipi 4:8) Ifi fyebo kuti fyatusansamusha kabili kuti fyalenga twateka umutima, ne ci kuti calenga twaleka ukuba sana no bulanda.—Amalumbo 94:18, 19.
Baibolo kuti yatwafwa ukuleka ukumfwa kwati tatwacindama.—Luka 12:6, 7.
Amashiwi ayengi ayaba mu Baibolo yalalenga twalaumfwa ukuti tatwaba fweka, no kuti Lesa Kabumba wesu aleshiba ifyo tumfwa.—Amalumbo 34:18; 1 Yohane 3:19, 20.
Baibolo yalitulaya ukuti Lesa akalenga tukaleke ukutontonkanya pa fyabipa ifya kale. (Esaya 65:17; Ukusokolola 21:4) Nga ca kuti tulacula sana pa mulandu wa matontonkanyo yabipa, ifi Baibolo yatulaya kuti fyalenga twatwalilila ukushipikisha.

Ifyo Baibolo Ileafwa Ba Jessica

Ifyo Ng’umfwa nga ndi Sana no Bulanda

“Ilyo nali ne myaka 25 balinsangile no bulwele bwa masakamika kabili bwalibipile sana. Naletontonkanya sana pa fyabipa ifyacitike kale. Badokota banjebele ukuti icalengele ndwale amasakamika nico naletontonkanya sana pa fyabipa ifyacitike kale. Nangu ca kuti balimpeele umuti, nalekabila no kungafwa ukuleka ukutontonkanya pa fyabipa.”

Ifyo Baibolo Ingafwa

“Nga ndi sana no bulanda, naleumfwa sana umwenso, nalecilamo ukusakamikwa kabili nalefilwa no kulaala. Ilingi line ubushiku naletontonkanya sana pa fintu ifyalelenga ndesakamikwa. Nga filya fine Amalumbo 94:19 yalanda, Lesa kuti atusansamusha no kututalalika umutima nga natusakamikwa. Kanshi nalebika Baibolo ne buuku umo nalembele amalembo ya kunsansamusha mupepi na po nalelaala. Nga nafilwa ukulaala, nalebelengako amalembo yamo aya mu Baibolo ne ci calelenga naumfwako bwino.

“Baibolo itukoselesha ukuleka ukutontonkanya pa fintu ifyapusana ne fyo Lesa afwaya. Kale nalemona kwati nshacindama, tapaba abantemwa kabili ndi wa cabe cabe fye. Lelo nalisambilila ukuti ukumfwa ifi kwalipusana ne fyo Baibolo isambilisha, pantu yena itila Lesa ni Shifwe uwaba ne cikuuku kabili alatusakamana. Nalitendeke ukubika amano ku fyo naletontonkanyapo pa kuti nilasakamikwa sana. Nalisambilila ukulaimona nge fyo Lesa amona. Ukucita ifi kwalilenga naleka ukuisuula no kutendeka ukulaimona ukuti nalicindama.

“Ndafwaisha ukwisamonako ilyo tukaleka ukutontonkanya pa fyabipa ifyacitike kale. Ukwishiba ifi kulalenga ndebika fye amano ku fyo ningakumanisha ukucita pali ino nshita, e lyo no kulashipikisha amafya ndekwata ukufikila inshita ikafike ilyo nshakalelwala amasakamika.”