3 | Ifyo Twingasambilila ku Bantu Balembwa mu Baibolo

BAIBOLO ILONDOLOLA . . .Abaume na banakashi abali abacishinka ukuti bali fye “nga ifwe.”—YAKOBO 5:17.

Umo aya Mashiwi Yalola

Mu Baibolo mwaba amalyashi ya cine aya baume na banakashi abaleumfwa ifyapusanapusana. Ilyo tulebelenga pa fya bacitikile, nalimo kuti twabelenga pa muntu umo uwa mu Baibolo uwaleumfwa nge fyo tuleumfwa.

Ifyo Ifi Fingamwafwa

Bonse fye tulafwaya abantu abeshibe ifyo tuleumfwa, maka maka nga natulwala amalwele ya matontonkanyo. Nga twabelenga pa malyashi ya cine aya bantu abalembwa mu Baibolo tulomfwako bwino pantu tuleshiba ukuti na bo bene baletontonkanya nelyo ukumfwa nge fi fine na ifwe tumfwa. Ici cilalenga twaishiba ukuti na bantu bambi balalwalapo ifi fine na ifwe tulwala, kabili ukwishiba ifi kulalenga tuleshipikisha nga natulwala amalwele ya matontonkanyo.

Mu Baibolo mwaliba amalyashi ya bantu abalefwaya sana ukubafwa. Bushe inshita shimo mulomfwapo ukuti ‘awe te kuti nkumanishe’? Ifi e fyaumfwile Mose, Eliya na Davidi.—Impendwa 11:14; 1 Ishamfumu 19:4; Amalumbo 55:4.
Amalembo yalalanda pali Hana umwanakashi uwalembwa mu Baibolo ukuti “umutima wakwe walecula” pa mulandu wa kuti talekwata abana kabili umukashi munankwe alemucusha sana.—1 Samwele 1:6, 10.
Twalalanda na pali Yobo, umwaume uo Baibolo yalandapo. Nangu ca kuti ali sana ne citetekelo alishileba sana no bulanda ica kuti inshita imo atile: “Nakaana umweo; nshakekale no mweo umuyayaya.”—Yobo 7:16.

Ukusambilila pa fyo abantu balembwa mu Baibolo balecita nga bali sana no bulanda, kuti kwalenga na ifwe twalashipikisha nga tuli sana no bulanda.

Ifyo Baibolo Ileafwa Ba Kevin

Ifyo Ubulwele bwa Bipolar Bulenga Ndeumfwa

“Bansangile no bu bulwele ilyo nali mupepi ne myaka 50. Kulaba inshita ilyo ng’umfwa kwati kuti nashipikisha bonse ubwafya ningakwata. Lelo inshita shimo ng’umfwa kwati no kufwa kwawama.”

Ifyo Baibolo Ingafwa

“Ndomfwa bwino nga natontonkanya pa mutumwa Petro uwalembwa mu Baibolo. Alipangile ifilubo ifingi ifyalengele aleumfwa kwati tacindama. Lelo mu cifulo ca kutwalilila fye ukulaumfwa ifi, asalilepo ukulaba ne fibusa abamubikileko amano. Nga nindwala ndomfwa sana ububi ica kuti ndatendeka ukumfwa kwati nshacindama. Nga filya Petro alecita, na ine ndesha na maka ukuba ne fibusa abambikako amano pa kuti ntwalilile ukushipikisha.

“Umuntu umbi uwalembwa mu Baibolo uulenga ndesansamuka ni Mfumu Davidi. Nga alufyanya aleba sana no bulanda. Na ine nga nacita fimo nelyo nalanda fimo ifyabipa ndaba sana no bulanda. Amashiwi ya kwa Davidi ayaba mu Amalumbo 51 yalansansamusha. Mu cikomo 3, Davidi atile: ‘nalishiba ububi bwandi, kabili ulubembu lwandi luli pa ntanshi yandi inshita yonse.’ Amashiwi yaba pali ili lembo yalanda fye pa fyo ng’umfwa nga ndi no bulanda pantu limo cilafya ukutontonkanya pa fisuma. Nalitemwa na mashiwi Davidi alandile mu cikomo 10 ayatila: ‘Lengeni muli ine umutima uwasanguluka, mwe Lesa, kabili bikeni muli ine umupashi uupya, uwashangila.’ Na ine ifi fine e fyo njeba Lesa pa kuti ntendeke ukumfwako bwino. Na mu kulekelesha amashiwi yaba mu cikomo 17 yalansansamusha. Yatila: ‘Umutima uwa bulanda kabili uwasakamikwa, tamwakausuule, mwe Lesa.’ Ili lembo lilalenga ndeumfwa ukuti Lesa alintemwa.

“Nga ndetontonkanya pa bantu balembwa mu Baibolo na pa fyo Lesa ancitila pali ino nshita, ndaba ne subilo lya kuti ifintu ku ntanshi fikawama. Ifyo Baibolo yalaya fya cine kabili filalenga natwalilila ukulashipikisha.”