Ifyo Twingaba no Mutende Nangu ca Kuti Twikala mu Calo Umwaba Inkondo
Ba Gary abali abashilika batile, “Ilyo nshilatendeka ukusambilila Baibo naleyipusha nati, ‘Cinshi mwi sonde mwafulila ubunkalwe e lyo no lufyengo?’ Lelo pali ino nshita naliba no mutende. Nalishiba ukuti Yehova Lesa akalenga mwi sonde lyonse mukabe umutende.”
Te ba Gary fye abo Baibo yalenga baba no mutende. Natulandeko pa fyo Baibo yalanda, ifyalenga bantu abengi baba no mutende.
BAIBO ITILA: “Imwe mwe Yehova muli basuma kabili mwali-iteyanya ukwelela.”—Amalumbo 86:5.
IFYO UKWISHIBA ICI ICISHINKA KWINGATWAFWA: Ba Wilmar, abekala ku Colombia batile, “Amashiwi yaba pali ici icikomo yalalenga naishiba ukuti Yehova wa luse. Kabili kuti ambelela uluse pa fyo nacitile ilyo nalelwa inkondo.”
BAIBO ITILA: “Pantu moneni! ndepanga imyulu iipya ne sonde ilipya; Kabili ifya kale mukafilaba, Kabili tafyakese na mu mutima wenu.”—Esaya 65:17.
IFYO UKWISHIBA ICI ICISHINKA KWINGATWAFWA: Ba Zafirah abekala ku United States batile, “Pali ino nshita nalilwala amasakamika pa mulandu ne fyo napitilemo ilyo nali umushilika. Nomba ili ilembo lilalenga naishiba ukuti Yehova Lesa akalenga nkalabe kuli fyonse ifyo napitilemo. Nalitemwa sana amashiwi ayaba pali ili ilembo.
BAIBO ITILA: “Ilyo akalateka, abalungami bakapuuka nge cani, No mutende ukaba konse kabili ukatwalilila ukubako nga filya umweshi utwalilila ukubako.”—Amalumbo 72:7.
IFYO UKWISHIBA ICI ICISHINKA KWINGATWAFWA: Ba Oleksandra aba ku Ukraine batile, “Ndatontonkanya sana pali aya amashiwi. Yalilenga naishiba ukuti inkondo ili no kupwa kabili tatwakalesakamana ukuti balupwa lwesu ne fibusa kuti babepaya mu nkondo.”
BAIBO ITILA: “Abantu bobe abafwa bakaba no mweo. . . . Buukeni no kusekelela, Mwe baba mu lukungu!”—Esaya 26:19.
IFYO UKWISHIBA ICI ICISHINKA KWINGATWAFWA: Ba Marie aba ku Rwanda batile, “Mupepi na balupwa lwandi bonse balibepeye ilyo kwali inkondo umo baipeye sana abaTutsi. Nomba ili ilembo lilalenga naishiba ukuti nkabamona na kabili. Ndafwaisha sana ukumfwa uko bakalaseka lintu bakabuushiwa.”
BAIBO ITILA: “Kwashala fye panono ababifi tabakabepo . . . Lelo abafuuka bakekala mu calo, Kabili bakasekelela nga nshi pantu mukaba sana umutende.”—Amalumbo 37:10, 11.
IFYO UKWISHIBA ICI ICISHINKA KWINGATWAFWA: Ba Daler, aba ku Tajikistan batile, “Nangu ca kuti inkondo yalipwa, mu calo mwaliba sana ulufyengo e lyo na bantu abacita ifyabipa. Amashiwi yaba pali ili ilembo yalansansamusha sana, yalalenga namona ukuti Yehova alishiba fyonse ifyo mpitamo, kabili alitulaya ukuti nomba line fye, tuli no kulaba kuli ifi fyonse.
Abantu bonse abo tulandilepo muli ino magazini baba pa Nte sha kwa Yehova abengi nga nshi abo Baibo ya-afwa ukuba no mutende. Balisambilila ukuleka ukupata abantu pa mulandu no mushobo wabo, icalo uko bafuma, umutundu wabo, e lyo ne milandu imbi. (Abena Efese 4:31, 32) Inte sha kwa Yehova tabaitumpa mu fikansa fya calo nangu ukulwako inkondo.—Yohane 18:36.
Inte sha kwa Yehova mwi sonde lyonse, balasansamusha ba Nte banabo. (Yohane 13:35) Ku ca kumwenako, ba Oleksandra abo tulandilepo kale, balifulumukile ku calo cimbi pamo na bankashi inabo ilyo kwali inkondo. Batile: “Ilyo twaingile mu calo cimbi twalimwene Inte sha kwa Yehova abekala muli cilya calo kabili balitupokelele. Ifyo batwafwile, fyalilengele catwangukilako ukutendeka ukwikala muli cilya calo.”
Tulemwita ukuti mukeselongana na ifwe. Pali uku ukulongana mukasambilila ifya kubomfya amashiwi ayaba mu Baibo ayalenga abantu abengi nga nshi baba no mutende. Nga kuti mwatemwa ukwishiba uko Inte sha kwa Yehova abekala mupepi no ko mwikala balonganina, kabiyeni pa webusaiti ya jw.org. Na kabili kuti mwalomba ukuti mutendeke ukusambilila Baibo ne Nte sha kwa Yehova mu lupapulo ulutila, Kuti mwaba ne Nsansa Umuyayaya!