Ukubika Amano ku Mulimo wa Kubila Imbila Nsuma mwi Sonde Lyonse

PALI Citatu pa 23 September mu 2015, Ibumba Litungulula lyaebele bonse ababombela pa Bethel mu calo conse ukuti kwali no kwalukako fimo mu cilonganino ca kwa Yehova pa kuti tulebomfya bwino imisangulo. Lyena pa Cibelushi pa 3 October mu 2015, ukubilisha ukwafumine kwi Bumba Litungulula kwatile: “Pa Abena Filipi 1:10, batweba ukuti, ‘tuleishiba bwino bwino ifyacilapo ukucindama.’ Ukulingana na aya amashiwi, Ibumba Litungulula lilefwaya ukubika amano ku fyo abantu ba kwa Lesa bakabila lwa ku mupashi e lyo no kutwala umulimo wa kubila imbila nsuma pa ntanshi.”

Ba Stephen Lett aba mwi Bumba Litungulula, muli programu ya JW Broadcasting balondolwele no kuti: “Apo Ibumba Litungulula nalibika sana amano ku kutwala umulimo wa Bufumu pa ntanshi, twalipitulukamo sana ukumona ifyo twingacefyako impendwa ya babombela pa misambo no kubomfya imisangulo ku mulimo wa kubila imbila nsuma. Ku ca kumwenako, fimo ifyo bacita lyonse ne milimo imo imo iyo babomba pa Bethel baleicefyako nelyo ukuifumyako. Ukucita ifi kukalenga impendwa ya bakalabombela pa Bethel ukucepako.”

Kanshi ukutendekela mu September mu 2015, nalimo abalebombela pa Bethel 5, 500 mwi sonde lyonse balibwelelamo mu kubila imbila nsuma mwi bala. Nangu ca kuti uku ukwaluka kwalekabila ukwalulako ifintu ifingi sana, Yehova alitupaala sana kabili calilenga umulimo wa kubila imbila no kusambilisha ukuya sana pa ntanshi.

Abaupana ku Sri Lanka abali pa Bethel abo batumine mwi bala mu kubila imbila nsuma balemona ukuti ukubatuma mwi bala lyali lishuko lya kulangilamo ukuti balitetekela Yehova kabili balicetekela ne cilonganino cakwe. Balembele ukuti: “Tatwaishibe ifyo ifintu fyali no kuba. Nomba twalishibe ukuti Yehova tali na kutulekelesha. Kanshi twapepele ukuti: ‘Twapaapaata Yehova, ifili fyonse ifikatucitikila mukatwafwe pa kuti tukatwalilile ukubomba bupainiya.’ Mu mweshi wa kubalilapo, tatwakwete ifingi ifyo twalekabila. Na lyo line, twalimwene ukuti Yehova alitutemwa kabili aletusakamana. Pali ino inshita tulacitako fimo ifitwafwa ukulakwata ifyo tukabila cila bushiku. Twalikwata ifya kucita pamo nga imilimo ya pa ng’anda, incito ya ku mubili e lyo na bupainiya. Tulabomfya bwino inshita pantu ifyo twasambilile pa Bethel filatwafwa. Takwaba ifilenga umuntu ukuba ne nsansa ukucila pa kwafwa abantu ukwishiba icine, kabili twaliba ne nsansa pantu bupainiya bulatwafwa ukubomba uyu mulimo wa kwafwa abantu.”

Bamo abalebombela pa Bethel ku Colombia abo batuma mwi bala balisambilila ululimi lumbi kabili baliya na mu kubila imbila ya Bufumu mu fifulo ifyabela umutali sana umo bashibila sana imbila nsuma. Aba bwananyina mu filonganino aba bamunyinefwe baya balitemwa sana ukuba pamo nabo. Kangalila wa muputule alilembele pa baupana bamo abo batumine ku cilonganino icaba mu muputule abombela, atile: “Aba bwananyina mu cilonganino balatasha sana pa fyo babafwilisha. Aba mu cilonganino pali ino nshita balabombesha mu mulimo wa kubila imbila nsuma kabili bamunyina balabasambilisha ifya kubomba imilimo yalekanalekana.” Bamo ababombelepo pa Bethel nabo baliipeelesha ukulabombako pa Bethel ubushiku bumo no kucilapo mu mulungu.

Munyina uwabombelepo pa Bethel ya ku Japan pa myaka 31, bamutumine ukuyabombela pa cilonganino apali fye baeluda babili. Apo icilonganino cali no kutendeka ukuwamyako fimo fimo ku Ng’anda ya Bufumu, apingwilepo ukukanalaya ku ncito ya ku mubili pa milungu ibili. Nomba ilyo kwashele panono ukuti batendeke ukuwamya Ing’anda ya Bufumu, kwali icinkukuma icikalamba mu Kumamoto umwabelele icilonganino balimo. Apo tabaleya ku ncito ya ku mubili, e baleyangalila umulimo wa kusakamana no kukoselesha abaponenwe ne cinkukuma. Batile: “Nga naibukisha ifyo cali, kuti natila Yehova antwele ku ncende ukwali sana ukukabila.”

Ba Phil na ba Sugar ababombelepo pa Bethel ya ku Australasia batile: “Ilyo twafumine mu Bethel, twalefwaisha ukwangusha imikalile. Twalipepele kuli Yehova pa kuti engatwafwa ukupingulapo bwino ifya kucita no kuti engatupaala muli fyonse ifyo twali no kupingulapo. Ico twalefwaisha kulabombesha mu mulimo wa kubila imbila nsuma mu cilonganino twali mu calo cimbi. Yehova alitupaala pa fyo twapingwilepo kabili alatwafwa ukulamubombela no mutima onse.” Pali ino inshita, ba Phil na ba Sugar baba mwi bumba lya lulimi lwa ciNgeleshi pa cishi ca Samal, mu Davaoci ku Philippines, umwaba bakasabankanya 34 na bapainiya 9. Ba Phil na ba Sugar balikwata na ama adresi ya bantu 120 abalefwaya ukusambilila Baibolo. Batile: “Ca cine ukuti kuli umulimo uukalamba uo tufwile ukubomba. Twaliba ne nsansa pantu twalicetekele Yehova. Ukucita ifi kwalilenga icitetekelo cesu cakoselako kabili twalitemwa sana Yehova.”

Nkashi umushimbe ku Russia uo batumine muli bupainiya bwaibela atile: “Umulimo wa bupainiya walilenga nakwata ishuko ilikalamba ilya kubombesha muli uyu umulimo uwacindama uwa kubila pa Bufumu bwa kwa Lesa kabili uushakatale aubombwa na kabili. Naliba ne nsansa pa fyo Yehova amomfya muli uyu mulimo.” Pali ino nshita uyu nkashi alatungulula amasambililo ya Baibolo 6. Pa bo atungulula paba na bafuma ku Iraq, ku Nigeria, ku Sri Lanka, ku Syria, na ku Zambia.

Bamunyinefwe abengi abalebombela pa Bethel mu Zambia abo batuma ukuya mu kubomba bupainiya balatemwa sana ilyo balebomba umulimo wa kubila imbila nsuma mwi bala. Munyinefwe Andrew uubomba bupainiya pamo no mwina mwakwe atile: “Ilyo papitile fye inshita iinono ukutula apo twafumine mu Bethel, twalyafwile abantu babili ukwishiba ukubelenga no kulemba. Umusambi tusambilisha Baibolo uuli ne myaka 10, nomba line fye ali no kulanda ilyashi lya kubalilapo pa kulongana kwa mu kati ka mulungu. Abaupana abo twashimikile balishile ku Cibukisho kabili tabatala abapuswapo mu kulongana. Balibikako amano ku kusambilila Baibolo kabili balacita bwino sana. Icalenga ukuti tulebomba bwino uyu mulimo ni co twalikonkele ubutungulushi bwa kwa Yehova, twalishibe ukuti akulatwafwa no kutupaala.”

Ba Edson na ba Artness nabo bene bekala mu Zambia. Ilyo papitile fye imyeshi iinono ukutula apo baupanine, balibatumine ukuya mu kubomba umulimo wa kubila imbila nsuma mwi bala. Ba Artness batile: “Pa Bethel, twalisambilile ifya kubomfya bwino indalama ne fintu ifyo tukwete pa kuti twaba ne nsansa no kukanaba ne nkongole. Twalitemenwe sana ukubombelako pa Bethel. Twalisambilila ifya kwaluka mu fyo tupanga ukucita mu mulimo wa kwa Lesa no kulomba Yehova ukutwafwa ukufishapo ifyo twapanga. Icitetekelo cesu muli Yehova calikoselako kabili tukatwalilila ukuba aba cishinka kuli ena.”